വിവാഹ സമ്മാനമായി ജഡേജയ്ക്ക് ഔഡി കാ‍ർ!

രാജ്കോട്ട്: ഇന്ത്യൻ ക്രിക്കറ്റ് ടീമിലെ യുവതാരം രവീന്ദ്ര ജഡേജയുടെ വിവാഹമാണ് ഇപ്പോൾ കളിക്കളത്തിന് പുറത്തെ വിശേഷം. ജഡേജയ്ക്ക് വിവാഹസമ്മാനമായി വധുവിന്‍റെ മാതാപിതാക്കള്‍ ഔഡി കാർ നല്‍കിയതാണ് പുതിയ വാർത്ത. 90 ലക്ഷം വിലമതിക്കുന്ന ആഢംബര കാറാണ് നൽകിയതെന്നാണ് റിപ്പോർട്ടുകൾ സൂചിപ്പിക്കുന്നത്. രാജ്കോട്ടിലെ ബിസിനസ്സുകാരനായ ഹർദേവ് സിങ് സൊളാങ്കിയുടെ ഏക മകളാണ് വധുവായ റിവാബ സൊളാങ്കി. മെക്കാനിക്കല്‍ എഞ്ചിനീയറാണ് റിവാബ. ഏപ്രില്‍ പതിനേഴിനാണ് വിവാഹം. വിവാഹത്തിനായി വളരെ വിപുലമായ ഒരുക്കങ്ങളാണ് നടത്തുന്നത്. തലേദിവസം ക്രിക്കറ്റിലെ സുഹൃത്തുക്കള്‍ക്കായി പ്രത്യേകം വിരുന്നും ഒരുക്കിയിട്ടുണ്ട്.


കഴിഞ്ഞ ഫെബ്രുവരി 5നായിരുന്നു ഇവരുടെ വിവാഹ നിശ്ചയം. തിങ്കളാഴ്ച്ച ജഡേജയും റിവാബയും ചേര്‍ന്നാണ് ഷോറൂമില്‍ നിന്ന് കാര്‍ ഏറ്റു വാങ്ങിയത്. RR എന്ന് തോന്നിക്കുന്ന വിധത്തിൽ 1212 എന്ന നമ്പരും ഇവർ സ്വന്തമാക്കിക്കഴിഞ്ഞു.