ഓസീസ് ട്വൻറി20 ടീമിനെ പരിശീലിപ്പിക്കാൻ റിക്കി പോണ്ടിങ്

മെൽബൺ: 2020 ലോകകപ്പിന് മുമ്പായി ഓസീസ് ട്വൻറി20 ടീമിൻെറ പരിശീലകനാവാൻ മുൻ നായകൻ റിക്കി പോണ്ടിങ് തയ്യാറെടുക്കുന്നു. പോണ്ടിങ് ടീമിൻെറ കോച്ചാവുമെന്ന് നേരത്തെ അഭ്യൂഹങ്ങളുണ്ടായിരുന്നു. എന്നാൽ ഇക്കാര്യം സ്ഥിരീകരിച്ച് ഒടുവിൽ താരം തന്നെ രംഗത്തെത്തി.

ഓസ്ട്രേലിയൻ ക്രിക്കറ്റ് ബോർഡുമായി ഇതുമായി ബന്ധപ്പെട്ട ചർച്ചകൾ നടത്തി വരികയാണെന്ന് അദ്ദേഹം പറഞ്ഞു. തനിക്ക് പരിശീലനത്തിൽ കൂടുതൽ ശ്രദ്ധ കേന്ദ്രീകരിക്കാൻ താൽപ്പര്യമുണ്ടെന്നും ഓസീസ് ക്രിക്കറ്റിന് വേണ്ടി കൂടുതൽ സംഭാവനകൾ നൽകാനാണ് ആഗ്രഹമെന്നും പോണ്ടിങ് വ്യക്തമാക്കി. എെസിസി ട്വൻറി20 റാങ്കിങിൽ നിലവിൽ ഏഴാം സ്ഥാനത്താണ് ഓസ്ട്രേലിയ.

നിലവിൽ ഓസീസ് ക്രിക്കറ്റ് ടീമിൻെറ പരിശീലകനായ ഡരൻ ലീമാൻ 2019 ആഷസ് പരമ്പരയോടെ സ്ഥാനമൊഴിയുമെന്ന് നേരത്തെ വ്യക്തമാക്കിയിരുന്നു. ഓരോ ഫോർമാറ്റിലും വ്യത്യസ്ത പരിശീലകരെ പരീക്ഷിക്കാനാണ് ഇനി ഓസീസ് ക്രിക്കറ്റ് ബോർഡ് ലക്ഷ്യമിടുന്നത്. ടെസ്റ്റിൽ മുൻ താരം ജസ്റ്റിൻ ലാംഗർ പരിശീലകനായി എത്തിയേക്കുമെന്നാണ് സൂചന.