രോഹിത് ശർമ്മ യോ-യോ ടെസ്റ്റ് പാസ്സായി; ടീമിനൊപ്പം ചേരും

ബെംഗലൂരു: ഇന്ത്യൻ ക്രിക്കറ്റ് ടീം ഉപനായകൻ രോഹിത് ശർമ്മ കായിക ക്ഷമതാ പരിശോധനയായ യോ-യോ ടെസ്റ്റ് പാസ്സായി. ഇതോടെ രോഹിത് ഇംഗ്ലണ്ട് പര്യടനത്തിനുള്ള ഇന്ത്യൻ ടീമിനൊപ്പം ചേരുമെന്ന് ഉറപ്പായി. ജൂൺ 23നാണ് ടീം ഇംഗ്ലണ്ടിലേക്ക് പോവുന്നത്. ജൂലൈ മൂന്നിനാണ് ഇന്ത്യയുടെ ഇംഗ്ലണ്ട് പര്യടനം ആരംഭിക്കുന്നത്.

ബെംഗലൂരുവിലെ നാഷണൽ ക്രിക്കറ്റ് അക്കാദമിയിൽ ബുധനാഴ്ചയാണ് രോഹിതിൻെറ യോ-യോ ടെസ്റ്റ് നടന്നത്. ഇന്ത്യൻ ടീമിൽ കളിക്കണമെങ്കിൽ യോ-യോ ടെസ്റ്റ് പാസ്സാവണമെന്ന നിബന്ധന ബിസിസിഎെ ആണ് വെച്ചത്.

യോ-യോ ടെസ്റ്റ് പാസ്സ് ആവാഞ്ഞതിനാൽ അമ്പാട്ടി റായിഡുവിനെ ഇംഗ്ലണ്ട് പര്യടനത്തിനുള്ള ടീമിൽ നിന്ന് ഒഴിവാക്കിയിരുന്നു.