സിക്സറില്‍ രോഹിത് ശര്‍മ്മയ്ക്ക് ലോക റെക്കോഡ്

ഒരു കലണ്ടര്‍ വര്‍ഷം ഏറ്റവും അധികം സിക്സറുകള്‍ പറത്തിയ റെക്കോഡ് ഇന്ത്യന്‍ ബാറ്റ്സ്‍മാന്‍ രോഹിത് ശര്‍മ്മയുടെ കൈയിലാണ്. ഏറ്റവും വേഗമേറിയ ടി20 സെ‍ഞ്ചുറി നേടിയ മത്സരത്തില്‍ രോഹിത് ഈ റെക്കോഡ് കുറിച്ചതാണ്.

65 സിക്സറുകളാണ് ഈ വര്‍ഷം രോഹിത് നേടിയത്.

ദക്ഷിണാഫ്രിക്കയുടെ എബി ഡി വില്ലിയേഴ്‍സിനെയാണ് രോഹിത് മറികടന്നത്. 2015ല്‍ ഡി വില്ലിയേഴ്‍സ്‍ തൊടുത്ത 63 സിക്സറുകളായിരുന്നു ഇതുവരെയുള്ള റെക്കോഡ്. ശ്രീലങ്കയെ തോല്‍പ്പിച്ച അവസാന ടി20 മത്സരത്തില്‍ ഒരു സിക്സറും രോഹിത് പറത്തി.

ട്വന്‍റി20 ഫോര്‍മാറ്റില്‍ രണ്ട് സെഞ്ചുറികള്‍ നേടുന്ന ഏക ഇന്ത്യന്‍താരം എന്ന റെക്കോഡും രോഹിതിന്‍റെ കൈയ്യിലാണ്. നാല് ബാറ്റ്‍സ്‍മാന്മാര്‍ക്ക് മാത്രമേ ഈ നേട്ടം ഇതുവരെ നേടാന്‍ കഴിഞ്ഞിട്ടുള്ളൂ.

ഒരു ഇന്നിങ്‍സില്‍ ഏറ്റവുമധികം സിക്സറുകള്‍ പറത്തുന്ന ഇന്ത്യന്‍താരം എന്ന റെക്കോഡും ഇപ്പോള്‍ രോഹിതിന്‍റെ പേരിലാണ്. ഏഴ്‍ സിക്സറുകള്‍ അടിച്ച ഇടംകൈയന്‍ ബാറ്റ്സ്‍മാന്‍ യുവ്‍രാജ് സിങ്ങാണ് ഇതുവരെ ഈ റെക്കോഡ് സൂക്ഷിച്ചിരുന്നത്.