ഇന്ത്യ ടെസ്റ്റ് ടീം പ്രഖ്യാപനം ഇന്ന്: സൂപ്പർ താരം പുറത്തേക്ക്? പുതുമുഖതാരം ഓപ്പണറായേക്കും

ന്യൂഡൽഹി: ദക്ഷിണാഫ്രിക്കക്ക് എതിരായ പരമ്പരക്കുള്ള ഇന്ത്യയുടെ ടെസ്റ്റ് ടീമിനെ ഇന്ന് പ്രഖ്യാപിക്കും. ട്വൻറി20 ടീമിനെ നേരത്തെ തന്നെ പ്രഖ്യാപിച്ചിരുന്നു. ഓപ്പണിങാണ് ടീം പ്രഖ്യാപനത്തിൽ സെലക്ടർമാർ നേരിടുന്ന പ്രധാന തലവേദന. മായങ്ക് അഗർവാളും കെഎൽ രാഹുലും ആണ് വെസ്റ്റ് ഇൻഡീസിനെതിരെ ടെസ്റ്റിൽ ഓപ്പൺ ചെയ്തിരുന്നത്.

ഇരുവർക്കും ടീമിന് മികച്ച തുടക്കം സമ്മാനിക്കാൻ സാധിച്ചിരുന്നില്ല. ദക്ഷിണാഫ്രിക്ക വെസ്റ്റ് ഇൻഡീസിനേക്കാൾ മികച്ച ടീമാണ്. അതിനാൽ തന്നെ ടീം തെരഞ്ഞെടുപ്പിൽ അപാകതകൾ സംഭവിച്ചാൽ സെലക്ടർമാർ വീണ്ടും വിമർശനത്തിന് ഇരയാവും. ഫോം ഇല്ലാഞ്ഞിട്ടും രാഹുലിനെ പരിഗണിക്കുന്നതിൽ വെസ്റ്റ് ഇൻഡീസ് പര്യടനത്തിനിടെ തന്നെ രൂക്ഷവിമർശനം ഉയർന്നിരുന്നു.

Read More: ലോകത്തെ ഏറ്റവും മികച്ച ബാറ്റ്സ്മാൻ ആരാണ് ?റബാദയുടെ ഉത്തരം ഇങ്ങനെ!

രോഹിത് ശർമയെ ഓപ്പണറാക്കിയേക്കും എന്ന സൂചനയാണ് ചീഫ് സെലക്ടർ എംഎസ്കെ പ്രസാദ് കഴിഞ്ഞ ദിവസം നൽകിയത്. ഇന്ത്യയിൽ നടക്കുന്ന മത്സരങ്ങൾ ആയതിനാൽ തന്നെ രോഹിതിനെ പരീക്ഷിക്കാൻ സാധ്യത കൂടുതലാണ്. കഴിഞ്ഞ ഒരു വർഷത്തോളം ടെസ്റ്റ് ടീമിൽ അവസരങ്ങൾ ലഭിച്ചിട്ടും ഫോമില്ലാത്ത രാഹുലിനെ പ്ലേയിങ് ഇലവനിൽ തന്നെ ചിലപ്പോൾ ഉൾപ്പെടുത്തിയേക്കില്ല.

Read More: ഇനി മുന്നിലുള്ളത് അത് മാത്രം, നേടിയെടുത്തേ പറ്റൂ; പുതിയ ലക്ഷ്യം വെളിപ്പെടുത്തി പാണ്ഡ്യ

ഫസ്റ്റ് ക്ലാസ് ക്രിക്കറ്റിൽ ബംഗാളിന് വേണ്ടി മികച്ച പ്രകടനം കാഴ്ച വെക്കുന്ന അഭിമന്യു ഈശ്വരൻ ടീമിൽ ഇടം പിടിച്ചേക്കാൻ സാധ്യതയുണ്ട്. 52 ഫസ്റ്റ് ക്ലാസ് മത്സരങ്ങളിൽ നിന്ന് അഭിമന്യു 4057 റൺസ് നേടിയിട്ടുണ്ട്. 13 സെഞ്ച്വറിയും 17 അർധശതകങ്ങളും അദ്ദേഹം നേടിയിട്ടുണ്ട്. ഗുജറാത്ത് താരം പ്രിയങ്ക് പഞ്ചൽ, ശുഭ്മാൻ ഗിൽ എന്നിവരും ടെസ്റ്റ് ടീമിൽ സ്ഥാനം ലഭിക്കാൻ സാധ്യതയുള്ളവരാണ്. വെസ്റ്റ് ഇൻഡീസ് പര്യടനത്തിൽ ഇല്ലാതിരുന്ന ഹാർദിക് പാണ്ഡ്യയും തിരികെ എത്തിയേക്കും.