സൊണാലി ബിന്ദ്രയുമായി പ്രണയത്തിലായിരുന്നോ? വിവാദങ്ങൾക്ക് മറുപടിയുമായി അക്തർ

ന്യൂഡൽഹി: പാക് ക്രിക്കറ്റ് താരം ശുഐബ് അക്തറിനെയും ബോളിവുഡ് താരം സൊണാലി ബിന്ദ്രയെയും ബന്ധപ്പെടുത്തി നിരവധി വാർത്തകൾ ഈയടുത്ത് പ്രചരിച്ചിരുന്നു. സൊണാലിയോട് അക്തറിന് കടുത്ത പ്രണയമായിരുന്നുവെന്നായിരുന്നു വാർത്തകൾ. താരത്തെ തട്ടിക്കൊണ്ടു പോവാൻ അക്തർ പദ്ധതിയിട്ടിരുന്നുവെന്ന് വരെ പ്രചാരണങ്ങൾ എത്തി.

ഇതോടെയാണ് അക്തർ തൻെറ യൂ ട്യൂബ് ചാനലിലൂടെ ഇക്കാര്യങ്ങൾക്ക് മറുപടിയുമായി എത്തിയത്. പ്രചരിപ്പിക്കപ്പെടുന്നതെല്ലാം അടിസ്ഥാന രഹിതമാണെന്ന് അക്തർ പറഞ്ഞു. സൊണാലിയുടെ സിനിമകൾ കണ്ടിട്ടുണ്ട് എന്നല്ലാതെ താൻ അവരുടെ ആരാധകൻ പോലും ആയിരുന്നില്ലെന്ന് അക്തർ പറഞ്ഞു.

താൻ ഒരു തവണ പോലും സൊണാലിയോട് സംസാരിച്ചിട്ടില്ല. അവരെ ഇന്ന് വരെ നേരിട്ട് കണ്ടിട്ട് പോലുമില്ല. എന്നിട്ടും എവിടെ നിന്നാണ് ഇത്തരത്തിലുള്ള പ്രചാരണങ്ങൾ ഉണ്ടാവുന്നതെന്നും അദ്ദേഹം ചോദിച്ചു.

"അവർ വളരെ സുന്ദരിയാണ്. അവർ അസുഖത്തോട് പോരാടിയ സമയത്ത് വലിയ ബഹുമാനം തോന്നി. ധീരയായ സ്ത്രീയാണവർ," അക്തർ കൂട്ടിച്ചേർത്തു. സൊണാലിക്ക് വേണ്ടി അക്തർ എന്തും ചെയ്യുമായിരുന്നുവെന്നും അവരെ തട്ടിക്കൊണ്ട് പോവാൻ പദ്ധതിയിട്ടിരുന്നുവെന്നുമായിരുന്നു വാർത്തകൾ.