ന്യൂസിലൻറിനെതിരായ ഇന്ത്യയുടെ ടെസ്റ്റ് ടീം: യുവതാരം തിരിച്ചെത്തി, രോഹിതിന് പകരക്കാരെയും പ്രഖ്യാപിച്ചു

ന്യൂസിലൻറിനെതിരായ ടി20 പരമ്പരയിൽ പരിക്കേറ്റ രോഹിത് ശർമയെ ഇന്ത്യയുടെ ഏകദീന ടീമിൽ നിന്നും ഒപ്പം ടെസ്റ്റ് ടീമിൽ നിന്നും ഒഴിവാക്കി. മായങ്ക് അഗർവാൾ ആയിരിക്കും ഏകദിനത്തിൽ രോഹിതിന് പകരം ഓപ്പണറാവുക. ശിഖർ ധവാനും ഇല്ലാത്തതിനാൽ രാഹുലും മായങ്കും ആയിരിക്കും ഇന്ത്യയുടെ ഓപ്പണർമാർ. ടെസ്റ്റ് ടീമിൽ ശുഭ്മാൻ ഗില്ലാണ് രോഹിതിൻെറ പകരക്കാരൻ. പൃഥ്വി ഷാ ടീമിൽ തിരിച്ചെത്തിയിട്ടുണ്ട്. മായങ്കും ഷായുമായിരിക്കും ഇന്ത്യക്കായി ഇന്നിങ്സ് ഓപ്പൺ ചെയ്യുക.

ലിമിറ്റഡ് ഓവർ ക്രിക്കറ്റിൽ മികച്ച ഫോമിൽ കളിക്കുന്ന രാഹുലിനെ ടെസ്റ്റ് പരമ്പരക്കുള്ള ടീമിൽ തിരിച്ചു വിളിക്കുമെന്ന് റിപ്പോർട്ടുകൾ ഉണ്ടായിരുന്നു. എന്നാൽ രാഹുലിനെ ടീമിലെടുത്തിട്ടില്ല. പൃഥ്വി ഷായെയും ശുഭ്മാൻ ഗില്ലിനെയുമാണ് ടീം മാനേജ്മെൻറ് പരിഗണിച്ചത്.

യുവ പേസർ നവദീപ് സെയ്നിയെ ആദ്യമായി ഇന്ത്യയുടെ ടെസ്റ്റ് ടീമിൽ ഉൾപ്പെടുത്തി. സീനിയർ പേസർ ഇശാന്ത് ശർമ പരിക്ക് കാരണം കളിക്കാൻ സാധ്യത കുറവാണ്. ഇശാന്തിനെയും നിലവിൽ ടീമിൽ പരിഗണിച്ചിട്ടുണ്ട്. എന്നാൽ ഇശാന്ത് പരിക്കിൽ നിന്ന് മോചിതനായില്ലെങ്കിൽ സെയ്നി പ്ലേയിങ് ഇലവനിൽ സ്ഥാനം പിടിച്ചേക്കും.

വിരാട് കോലി (ക്യാപ്റ്റൻ), മായങ്ക് അഗർവാൾ, പൃഥ്വി ഷാ, ശുഭ്മാൻ ഗിൽ, ചേതേശ്വർ പൂജാര, അജിങ്ക്യ രഹാനെ (വൈസ് ക്യാപ്റ്റൻ), ഹനുമ വിഹാരി, വൃദ്ധിമാൻ സാഹ (വിക്കറ്റ് കീപ്പർ), റിഷഭ് പന്ത് (വിക്കറ്റ് കീപ്പർ), ആർ അശ്വിൻ, രവീന്ദ്ര ജഡേജ, ജസ്പ്രീത് ബുംറ, ഉമേഷ് യാദവ്, മുഹമ്മദ് ഷമി, നവദീപ് സെയ്നി, ഇശാന്ത് ശർമ.