സെഞ്ച്വറി നേടി ദ്രാവിഡിൻെറയുെം ജോഷിയുടെയും മക്കൾ

ബെംഗലൂരു: ഇന്ത്യൻ ക്രിക്കറ്റിൽ മുൻ താരങ്ങളുടെ മക്കൾ രംഗം കയ്യടക്കുകയാണ്. സച്ചിൻ ടെണ്ടുൽക്കറുടെ മകന് ശേഷം ജൂനിയർ ക്രിക്കറ്റിൽ മികച്ച പ്രകടനം നടത്തി രാഹുൽ ദ്രാവിഡിൻെറയും സുനിൽ ജോഷിയുടെയും മക്കൾ.

കർണാടക സ്റ്റേറ്റ് ക്രിക്കറ്റ് അസോസിയേഷൻ നടത്തിയ അണ്ടർ 14 ക്രിക്കറ്റ് ടൂർണമെൻറിലാണ് താരങ്ങളുടെ മക്കൾ മിന്നുന്ന പ്രകടനം കാഴ്ച വെച്ചത്. മത്സരത്തിൽ ദ്രാവിഡിൻെറ മകൻ സമിത്തും സുനിൽ ജോഷിയുടെ മകൻ ആര്യൻ ജോഷിയും സെഞ്ച്വറി നേടി. മല്യ അദിതി ഇൻറർനാഷണൽ സ്കൂളിന് വേണ്ടിയാണ് ഇരുവരും തകർത്തടിച്ചത്.

സമിത്ത് 150 റൺസ് നേടിയപ്പോൾ ആര്യൻ ജോഷി 154 റൺസ് നേടി ടോപ് സ്കോററായി. ഇരുവരുടെയും വെടിക്കെട്ട് ബാറ്റിങിൻെറ പിൻബലത്തിൽ ടീം 50 ഓവറിൽ അഞ്ച് വിക്കറ്റ് നഷ്ടത്തിൽ 500 റൺസെടുത്തു. എതിർ ടീമായ വിവേകാനന്ദ സ്കൂളിനെ വെറും 88 റൺസിന് പുറത്താക്കി വമ്പൻ വിജയവും നേടി.