രോഹിതിനെ ഓസീസിനെതിരെ ആറാമത് ഇറക്കണമെന്ന് ഗാംഗുലി

കൊൽക്കത്ത: പരിമിത ഓവർ ക്രിക്കറ്റിൽ മികച്ച ഫോമിൽ കളിക്കുന്ന രോഹിത് ശർമ്മയെ ഓസ്ട്രേലിയക്കെതിരായ ടെസ്റ്റ് പരമ്പരയിൽ കളിപ്പിക്കണമെന്ന് മുൻ ഇന്ത്യൻ നായകൻ സൗരവ് ഗാംഗുലി. രോഹിതിനെ ആറാമനായി ഇറക്കി പരീക്ഷിക്കണമെന്നാണ് ഗാംഗുലിയുടെ അഭിപ്രായം. രോഹിതിൻെറ നിലവിലുള്ള ഫോം ടീമിന് ഗുണം ചെയ്യുമെന്നും അദ്ദേഹം പറഞ്ഞു.

ഓസീസ് പിച്ചിൽ രോഹിതിന് നന്നായി കളിക്കാൻ സാധിക്കുമെന്നാണ് കരുതുന്നത്. നല്ല ഫോമിലുള്ള ആത്മവിശ്വാസമുള്ള ഒരു താരത്തെ മാറ്റി നിർത്തുന്നത് ശരിയല്ല. അദ്ദേഹത്തെ ഉപയോഗപ്പെടുത്തുകയാണ് ചെയ്യേണ്ടതെന്നും ഗാംഗുലി പ്രതികരിച്ചു.

70 വർഷത്തെ ചരിത്രത്തിൽ ഇതേവരെ ഓസ്ട്രേലിയൻ മണ്ണിൽ ഇന്ത്യ പരമ്പര വിജയിച്ചിട്ടില്ല. 2003-04 കാലത്ത് ഗാംഗുലിയുടെ ഇന്ത്യ 1-1ന് പരമ്പര സമനിലയിൽ പിടിച്ചിരുന്നു. ഇത്തവണ മികച്ച ടീമുമായി പോവുന്ന ഇന്ത്യക്ക് വിജയ പ്രതീക്ഷയുണ്ടെന്നാണ് ഗാംഗുലിയുടെ വിലയിരുത്തൽ. സ്മിത്തും വാർണറും ഇല്ലാത്ത ഓസ്ട്രേലിയ പ്രതിസന്ധിയിലാണെന്നും അദ്ദേഹം പറഞ്ഞു.