ചാഹലിന് അഞ്ച് വിക്കറ്റ്: ദക്ഷിണാഫ്രിക്ക 118ന് പുറത്ത്

സെഞ്ചൂറിയൻ: സ്പിന്നർമാർ എറിഞ്ഞിട്ടതോടെ സെഞ്ചൂറിയനിൽ ദക്ഷിണാഫ്രിക്കൻ ബാറ്റിങ് നിര തകർന്ന് വീണു. ഇന്ത്യക്കെതിരായ രണ്ടാം ഏകദിനത്തിൽ 32.2 ഓവറിൽ ദക്ഷിണാഫ്രിക്ക 118 റൺസിന് എല്ലാവരും പുറത്തായി. ഇന്ത്യക്കായി സ്പിന്നർ യുസ്‍വേന്ദ്ര ചാഹൽ 22 റൺസ് വഴങ്ങി അഞ്ച് വിക്കറ്റെടുത്തു.

കുൽദീപ് യാദവ് മൂന്നും, പേസ‍ർമാരായ ബുംറ, ഭുവനേശ്വ‍ർ കുമാർ എന്നിവർ ഓരോ വിക്കറ്റ് വീതവും വീഴ്ത്തി. ടോസ് നേടി ഫീൽഡിങ് തെരഞ്ഞെടുത്ത ഇന്ത്യൻ നായകൻ വിരാട് കോഹ്‍ലിയുടെ തീരുമാനം ശരിവെക്കുന്ന രീതിയിലാണ് ഇന്ത്യൻ ബൗള‍ർമാരുടെ പ്രകടനം.

ആദ്യ പതിനഞ്ചോവറിനുള്ളിൽ തന്നെ ദക്ഷിണാഫ്രിക്കക്ക് നാല് വിക്കറ്റുകൾ നഷ്ടമായിരുന്നു. ആദ്യ മത്സരത്തിന് ഇറങ്ങിയ കായ സോണ്ടോയും (25) ഡുമിനി (25)യുമാണ് ദക്ഷിണാഫ്രിക്കൻ നിരയിലെ ടോപ് സ്കോറർമാർ.