ഇന്ത്യയെ പരിശീലിപ്പിക്കാൻ ഫീൽഡിങ് ഇതിഹാസം ജോണ്ടി റോഡ‍്‍സ് വരുന്നു?

ന്യൂഡൽഹി: ഇന്ത്യൻ ക്രിക്കറ്റിൽ പരിശീലക സ്ഥാനത്തേക്ക് അടക്കം പുതിയ അപേക്ഷകൾ ക്ഷണിച്ചിരിക്കുകയാണ്. ഹെഡ് കോച്ച് രവി ശാസ്ത്രിയുടെയും സപ്പോർട്ട് സ്റ്റാഫിൻെറയും കാലാവധി ലോകകപ്പോടെ അവസാനിച്ചിരുന്നു. വെസ്റ്റ് ഇൻഡീസ് പര്യടനം കൂടി നിലവിലുള്ള സപ്പോർട്ട് സ്റ്റാഫ് തന്നെയായിരിക്കും ടീമിനൊപ്പം തന്നെ ഉണ്ടാവുക. രവി ശാസ്ത്രി അടക്കമുള്ളവർ ഇനി പരിശീലകനാവണമെങ്കിൽ വീണ്ടും അപേക്ഷിക്കണം.

മുൻതാരങ്ങൾ അടക്കം നിരവധി പേർ ഇന്ത്യയുടെ പരിശീലകസ്ഥാനത്തേക്ക് അപേക്ഷിച്ചിട്ടുണ്ടെന്ന് റിപ്പോർട്ടുകളുണ്ട്. വിദേശ പരിശീലകരായ മഹേല ജയവർധനെ, ടോം മൂഡി എന്നിവർ ഇന്ത്യൻ പരിശീലക സ്ഥാനത്തേക്ക് പരിഗണിക്കപ്പെടുന്നുണ്ടെന്നാണ് റിപ്പോർട്ടുകൾ. അതിനിടെ ഇന്ത്യയുടെ ഫീൽഡിങ് പരിശീലക സ്ഥാനത്തേക്ക് ദക്ഷിണാഫ്രിക്കൻ ക്രിക്കറ്റ് ഇതിഹാസം ജോണ്ടി റോഡ‍്‍സ് വന്നേക്കുമെന്ന് സൂചന. ഹെഡ് കോച്ച്, ഫീൽഡീങ് കോച്ച്, ബാറ്റിങ്, ബോളിങ് കോച്ച് എന്നിവയിലേക്കാണ് ബിസിസിഐ അപേക്ഷകൾ ക്ഷണിച്ചിരിക്കുന്നത്.

അന്താരാഷ്ട്ര ക്രിക്കറ്റിൽ ഫീൽഡിങിൻെറ പര്യായമാണ് ദക്ഷിണാഫ്രിക്കൻ ക്രിക്കറ്റർ ജോണ്ടി റോഡ‍്‍സ്. കളിക്കാറുണ്ടായിരുന്ന കാലത്ത് റോഡ‍്‍സ് ഉള്ളിടത്തേക്ക് പന്ത് അടിച്ചിടാൻ മുൻനിര ബാറ്റ്സ്മാൻമാർ അടക്കമുള്ളവർ ഭയന്നിരുന്നു. ഫീൽഡിങ് പ്രകടനത്തിന് മാൻ ഓഫ് ദി മാച്ച് പുരസ്കാരം ലഭിച്ചിട്ടുള്ള അപൂർവം താരങ്ങളിലൊരാളാണ് റോഡ‍്‍സ്.

ഇന്ത്യൻ പരിശീലകനാവാൻ ഗാംഗുലിയും സെവാഗും വരില്ല; കാരണം ഇതാണ്!

ഇന്ത്യയുടെ ഫീൽഡിങ് പരിശീലകനാവാൻ താൽപര്യമുണ്ടെന്ന് റോഡ‍്‍സ് ആഗ്രഹം പ്രകടിപ്പിച്ചതായി മുംബൈ മിറർ റിപ്പോർട്ട് ചെയ്യുന്നു. നിലവിൽ ആർ ശ്രീധറാണ് ഇന്ത്യയുടെ ഫീൽഡിങ് കോച്ച്. അദ്ദേഹത്തിൻെറ പരിശീലനത്തിന് കീഴിൽ ഇന്ത്യ ഏറെ മെച്ചപ്പെട്ടിട്ടുണ്ട്. ലോകകപ്പിലടക്കം ഇന്ത്യ ഫീൽഡിങിൽ അധികം പിഴവുകൾ വരുത്താത്ത ടീമായിരുന്നു. ശ്രീധർ ഇനിയും തുടരാൻ ആഗ്രഹിക്കുന്നുണ്ടെങ്കിൽ ബിസിസിഐ എന്ത് തീരുമാനം എടുക്കും എന്നത് നിർണായകമായിരിക്കും.