ശ്രീലങ്കൻ പേസർ നുവാൻ കുലശേഖര അന്താരാഷ്ട്ര ക്രിക്കറ്റിൽ നിന്ന് വിരമിച്ചു

കൊളംബോ: ശ്രീലങ്കൻ പേസർ നുവാൻ കുലശേഖര അന്താരാഷ്ട്ര ക്രിക്കറ്റിൽ നിന്ന് വിരമിച്ചു. ട്വൻറി20 ലോകകപ്പ് കിരീടം നേടിയ ലങ്കൻ ടീമിൽ അംഗമായിരുന്നു കുലശേഖര. ശ്രീലങ്കക്കായി ഏറ്റവും കൂടുതൽ വിക്കറ്റുകൾ വീഴ്ത്തിയ മൂന്നാമത് പേസറും അഞ്ചാമത് ബോളറുമാണ് അദ്ദേഹം.

37ാം പിറന്നാൾ ആഘോഷത്തിന് ശേഷം രണ്ട് ദിവസങ്ങൾക്ക് ശേഷമാണ് ലങ്കൻ താരത്തിൻെറ വിരമിക്കൽ വാർത്തകൾ പുറത്ത് വരുന്നത്. ശ്രീലങ്കൻ പ്രാദേശിക മാധ്യമങ്ങളാണ് താരം വിരമിക്കുന്നതുമായി ബന്ധപ്പെട്ട വാർത്തകൾ പുറത്ത് വിട്ടത്. 2003ൽ ഇംഗ്ലണ്ടിനെതിരെയായിരുന്നു കുലശേഖരയുടെ ഏകദിനത്തിലെ അരങ്ങേറ്റം.

2017ൽ സിംബാവെക്കെതിരെയാണ് അദ്ദേഹം അവസാനമായി കളിച്ചത്. ലങ്കയുടെ തന്നെ മറ്റൊരു സൂപ്പർ പേസർ ലസിത് മലിംഗയും കഴിഞ്ഞ ദിവസം ക്രിക്കറ്റിൽ നിന്ന് വിരമിക്കുന്നതായി പ്രഖ്യാപിച്ചിരുന്നു. ബംഗ്ലാദേശിനെതിരെ ജൂലായ് 26ന് നടക്കുന്ന മത്സരം തൻെറ അവസാന അന്താരാഷ്ട്ര മത്സരമായിരിക്കുമെന്ന് മലിംഗ പ്രഖ്യാപിച്ചിരുന്നു. മലിംഗയും കുലശേഖരയും ചേർന്നാണ് കഴിഞ്ഞ പത്ത് വർഷത്തോളം ലങ്കൻ പേസ് ബോളിങ് പടയെ നയിച്ചിരുന്നത്.