ചോദ്യം ചെയ്ത് ഗാവസ്കര്‍
ക്രിക്കറ്റിൽ നിന്ന് ദീർഘ കാലം വിട്ടുനിൽക്കുന്ന ധോണിയുടെ തീരുമാനത്തെ ചോദ്യം ചെയ്ത് മുൻ ഇന്ത്യൻ താരം സുനിൽ ഗാവസ്‌കർ രംഗത്തെത്തിയിരിക്കുകയാണ്. ലോകകപ്പ് ടി20ക്കുള്ള ഇന്ത്യൻ ടീമിൽ ധോണി ഇടം പിടിക്കുമോയെന്ന മാധ്യമപ്രവര്‍ത്തകരുടെ ചോദ്യത്തിന് പ്രതികരണമായാണ് ഗാവസ്‌കർ ഇന്ത്യൻ ടീമിൽ നിന്ന് ധോണി ദീർഘ കാലം ഇടവേള എടുത്തതിനെ ചോദ്യം ചെയ്തത്.
ഇന്ത്യന്‍ ടീമില്‍ ഇതൊക്കെ നടക്കുമോ?
എങ്ങനെയാണ് ഒരാള്‍ക്ക് ഇത്രയും കാലം ഇന്ത്യൻ ടീമിൽ നിന്ന് സ്വയം വിട്ടുനിൽക്കാൻ കഴിയുകയെന്ന് സുനിൽ ഗാവസ്‌കർ ചോദിച്ചു. ഇന്ത്യന്‍ ടീമില്‍ ഇതൊക്കെ സാധിക്കുമോ എന്നും അദ്ദേഹം ചോദിച്ചു. ധോണിയുടെ ഫിറ്റ്നസിന്റെ കാര്യം തനിക്ക് അറിയില്ലെന്നും എന്നാൽ ഇത്രയും കാലം എന്ത്കൊണ്ട് ഇന്ത്യൻ ടീമിൽ നിന്ന് വിട്ടുനിന്നു എന്ന ചോദ്യത്തിന് ധോണി തന്നെ ഉത്തരം നല്‍കേണ്ടതുണ്ടെന്നും ഗാവസ്‌കർ പറഞ്ഞു.
തോല്‍വിക്ക് ശേഷം ധോണിയില്ല
കഴിഞ്ഞ ജൂലൈയിൽ ന്യൂസിലാൻഡിനെതിരെ ഇന്ത്യ ലോകകപ്പ് സെമിയിൽ തോറ്റതിന് ശേഷം ധോണി ഇന്ത്യക്ക് വേണ്ടി കളിച്ചിട്ടേയില്ല. അടുത്ത ഐപിഎല്‍ സീസണില്‍ ചെന്നൈ സൂപ്പർ കിങ്സിന് വേണ്ടി കളിച്ച് ധോണി ക്രിക്കറ്റിലേക്ക് മടങ്ങിവരുമെന്നാണ് ആരാധകര്‍ കരുതുന്നത്. കഴിഞ്ഞ ദിവസം ഇന്ത്യൻ പരിശീലകനായിരുന്ന രവി ശാസ്ത്രി ധോണി ഏകദിന ക്രിക്കറ്റിൽ നിന്ന് വിരമിച്ചേക്കുമെന്ന് സൂചന നല്‍കി രംഗത്തെത്തിയിരുന്നു.
ധോണി ആര്‍മിക്കൊപ്പം
ക്രിക്കറ്റില്‍ നിന്ന് ലീവെടുത്ത് എംഎസ് ധോണി നേരെ പോയത് ടെറിട്ടോറിയല്‍ ആര്‍മിയിലെ തന്‍റെ യൂണിറ്റിനൊപ്പം പ്രവര്‍ത്തിക്കാനാണ്. ഏകദിന ലോകകപ്പ് അവസാനിച്ചത് മുതല്‍ എംഎസ് ധോണി ആര്‍മിയില്‍ തന്‍റെ സഹപ്രവര്‍ത്തകര്‍ക്കൊപ്പം ചെലവഴിക്കുകയാണ്. യൂണിറ്റില്‍ വിവിധ പരിശീലന പരിപാടികളില്‍ താരം പങ്കെടുക്കുന്നതിന്‍റെ ദൃശ്യങ്ങളും ചിത്രങ്ങളുമെല്ലാം നേരത്തേ പുറത്ത് വന്നിരുന്നു.