ടി20 ലോകകപ്പ് ടീം; മൂന്ന് സൂപ്പർതാരങ്ങളുടെ സ്ഥാനം ഐപിഎല്ലിലെ പ്രകടനം നിർണയിക്കും!!

ഇന്ത്യൻ പ്രീമിയർ ലീഗിന് ശേഷമാണ് ഇന്ത്യയുടെ ടി20 ലോകകപ്പ് ടീം പ്രഖ്യാപിക്കുക. നിലവിൽ ടീമിൽ സ്ഥാനം ഉറപ്പിച്ചിട്ടുള്ള താരങ്ങൾക്കും ഐപിഎൽ നിർണായകമാണ്. ലോകത്ത് ഏറ്റവും മികച്ച റിസർവ് നിരയുള്ള ടി20 ടീമുകളിൽ ഒന്നാണ് ഇന്ത്യ. താരങ്ങൾ തമ്മിലുള്ള ആരോഗ്യകരമായ മത്സരത്തിന് തന്നെയായിരിക്കും ഐപിഎൽ സാക്ഷ്യം വഹിക്കുക.

ഇക്കഴിഞ്ഞ ഏകദിന ലോകകപ്പ് മുതൽ പരിക്കിൻെറ പിടിയിലാണ് ശിഖർ ധവാൻ. രോഹിത് ശർമക്കൊപ്പം കഴിഞ്ഞ കുറച്ച് കാലമായി ഇന്ത്യൻ ടീമിൻെറ ഓപ്പണറായ ധവാന് ടി20 ലോകകപ്പ് ടീമിൽ സ്ഥാനം ഉറപ്പാക്കാനാവുമോയെന്ന് കണ്ടറിയണം. ടീമിലെ സീനിയർ താരമാണെങ്കിലും ഈയടുത്തായി മോശം ഫോമിലാണ് ധവാൻ. കെഎൽ രാഹുൽ ഇന്ത്യയുടെ പ്ലേയിങ് ഇലവനിൽ സ്ഥാനം ഉറപ്പാക്കിയതാണ് ധവാന് വെല്ലുവിളിയാവുന്നത്. ഡൽഹി ക്യാപിറ്റൽസിൻെറ ഓപ്പണറാണ് ധവാൻ.

മഹേന്ദ്ര സിങ് ധോണിയുടെ പിൻഗാമിയായി ഇന്ത്യ പ്രഖ്യാപിച്ച താരമാണ് റിഷഭ് പന്ത്. കിട്ടിയ അവസരങ്ങളെല്ലാം പാഴാക്കിത്തുടങ്ങിയതോടെ പന്തിന് ടീമിലെ സ്ഥാനം നഷ്ടമായി. കെഎൽ രാഹുലാണ് നിലവിൽ ടീം ഇന്ത്യയുടെ വിക്കറ്റ് കീപ്പർ. റിസർവ് വിക്കറ്റ് കീപ്പറെന്ന നിലയിൽ എങ്കിലും പന്തിന് ലോകകപ്പ് ടീമിൽ സ്ഥാനം ലഭിക്കേണ്ടതാണ്. എന്നാൽ രാഹുലിന് പുറമെ സഞ്ജു സാംസൺ, ഇഷൻ കിഷൻ തുടങ്ങിയ താരങ്ങളുടെ ഐപിഎൽ പ്രകടനവും പന്തിന് വെല്ലുവിളിയാവും.

മഹേന്ദ്ര സിങ് ധോണി ഒരു ലോകകപ്പ് കൂടി കളിക്കുമോയെന്നത് തീരുമാനിക്കുക ഐപിഎല്ലായിരിക്കും. കഴിഞ്ഞ രണ്ട് സീസണിൽ ധോണിയും അദ്ദേംഹം നയിക്കുന്ന ടീമായ ചെന്നൈ സൂപ്പർ കിങ്സും തകർപ്പൻ പ്രകടനമാണ് കാഴ്ച വെച്ചത്. ലോകത്തെ ഏറ്റവും മികച്ച ഫിനിഷർമാരിൽ ഒരാളായ ധോണിയുടെ ബാറ്റിങ് പ്രകടനം കാണാൻ ആരാധകരും കാത്തിരിക്കുകയാണ്. ഏകദിന ലോകകപ്പിന് ശേഷം ഇന്ത്യൻ ടീമിൽ കളിച്ചിട്ടില്ലാത്ത ധോണി ഐപിഎല്ലിലായിരിക്കും തിരിച്ചെത്തുക.