ധോണി ഇന്ത്യക്ക് സച്ചിനെ പോലെയെന്ന് കപിൽ

ന്യൂഡൽഹി: എംഎസ് ധോണി യുവതാരങ്ങൾക്ക് വഴി മാറി കൊടുക്കണമെന്ന ചർച്ചകൾ പുരോഗമിക്കവേ താരത്തിന് പിന്തുണയുമായി ഇതിഹാസതാരം കപിൽ ദേവ്. വരുന്ന ട്വൻറി20 ലോകകപ്പിൽ ഇന്ത്യൻ ടീമിലെ ഏറ്റവും പ്രധാനപ്പെട്ട താരം ധോണിയായിരിക്കുമെന്ന് അദ്ദേഹം പറഞ്ഞു.

"ചിലപ്പോൾ ശരാശരി പ്രകടനം കാഴ്ച വെക്കുന്നതിന് എല്ലാവരും ധോണിയെ പഴിക്കുന്നത് എന്തിനാണെന്ന് എനിക്ക് മനസ്സിലാവുന്നില്ല. ഫോമും പ്രായവും തമ്മിൽ യാതൊരു ബന്ധവുമില്ല. തൻെറ 38ാം വയസ്സിലാണ് സച്ചിൻ ഇന്ത്യയെ ലോക കിരീടം ചൂടിച്ചതെന്ന് മറന്ന് പോവരുത്." കപിൽ പറഞ്ഞു.

വരുന്ന ലോകകപ്പിൽ ധോണിക്ക് പകരം വെക്കാൻ മറ്റ് ഏത് താരമാണുള്ളതെന്നും കപിൽ ചോദിച്ചു. സുനിൽ ഗാവസ്കർ, ഇന്ത്യൻ കോച്ചും മുൻ താരവുമായ രവി ശാസ്ത്രി തുടങ്ങിയവരും നേരത്തെ ധോണിയെ അനുകൂലിച്ച് രംഗത്തെത്തിയിരുന്നു.