ടെസ്റ്റ് റാങ്കിങിൽ പൂജാര രണ്ടാമത്, കോഹ്‍ലിക്ക് അഞ്ചാം സ്ഥാനം

ദുബായ്: ലോക ടെസ്റ്റ് ക്രിക്കറ്റ് റാങ്കിങിൽ ഇന്ത്യൻ ഓപ്പണർ ചേതേശ്വർ പൂജാര രണ്ടാം സ്ഥാനത്തെത്തി. ഇന്ത്യൻ ക്യാപ്റ്റൻ വിരാട് കോഹ്‍ലി ഏറ്റവും പുതിയ റാങ്കിങിലും അഞ്ചാം സ്ഥാനത്ത് തുടരുകയാണ്. ഓസീസ് നായകൻ സ്റ്റീവ് സ്മിത്താണ് റാങ്കിങിൽ ഒന്നാമത്.

ശ്രീലങ്കക്കെതിരായ മികച്ച പ്രകടനമാണ് പൂജാരയെ രണ്ടാം സ്ഥാനത്തെത്തിച്ചത്. കരിയറിലെ ഏറ്റവും മികച്ച പോയൻറുമായി (888) നാലാം സ്ഥാനത്ത് നിന്നാണ് അദ്ദേഹം രണ്ടാം സ്ഥാനത്തേക്ക് ഉയ‍ർന്നത്. കോഹ്‍ലിയും പൂജാരയും തമ്മിൽ 11 പോയിൻറിൻെറ വ്യത്യാസമുണ്ട്.

941 പോയൻറോടെയാണ് സ്മിത്ത് ഒന്നാം സ്ഥാനത്ത് തുടരുന്നത്. ഇംഗ്ലണ്ട് നായകൻ ജോ റൂട്ടാണ് രണ്ടാമത്. ന്യൂസിലൻറ് നായകൻ കെയ്ൻ വില്യംസൺ നാലാം സ്ഥാനത്താണ്. ബൗളർമാരുടെ പട്ടികയിൽ ഇന്ത്യയുടെ രവീന്ദ്ര ജഡേജ രണ്ടാം സ്ഥാനത്തുണ്ട്. ആ‍ർ.അശ്വിൻ നാലാമതെത്തി. ഇംഗ്ലണ്ടിൻെറ ജെയിംസ് ആൻഡേഴ്സണാണ് ബൗളർമാരുടെ പട്ടികയിൽ ഒന്നാമത്.

ഓൾ റൗണ്ട‍ർമാരുടെ പട്ടികയിൽ അശ്വിൻ മൂന്നാമതെത്തി. ബംഗ്ലാദേശിൻെറ സാക്കിബ് അൽ ഹസ്സനാണ് ഒന്നാമത്.