ഫ്ലിന്‍റോഫിന്‍റെ കമന്‍റിന് ബ്രോഡിനെ 'പഞ്ഞിക്കിട്ട' യുവി; ഒരോവറിലെ ആറ് സിക്സിന് ഇന്ന് 12 വയസ്

അന്താരാഷ്ട്ര ക്രിക്കറ്റില്‍ നിന്ന് പാ‍ഡഴിച്ചെങ്കിലും യുവരാജ് സിങ്ങ് എന്ന ക്രിക്കറ്ററെ ലോകം ഓര്‍ക്കുന്നത് പ്രഥമ ടി20 ലോകകപ്പിലെ ആ ആറു സിക്സറുകളുടെ പേരിലാണ്. കൃത്യമായി പറഞ്ഞാല്‍ പന്ത്രണ്ട് വര്‍ഷം മുന്നേ ഇതേദിവസമായിരുന്നു യുവിയുടെ ബാറ്റിന്‍റെ ചൂടിന് സ്റ്റുവര്‍ട് ബ്രോഡ് ഇരയായത്. അതിന് കാരണക്കാരനാകട്ടെ ആന്‍ഡ്രു ഫ്ലിന്‍റോഫും.

തന്‍റെ ഓവര്‍ കഴിഞ്ഞ് മടങ്ങവെ രണ്ട് ഫോറുകള്‍ വഴങ്ങേണ്ടി വന്നതിന്‍റെ പേരിലായിരുന്നു യുവരാജിനോട് ‍‍‍ഫ്ലിന്‍റോഫ് 'ചൊറിഞ്ഞത്'. എന്നാല്‍ ഫ്ലിന്‍റോഫോ അടുത്ത ഓവര്‍ എറിയാനെത്തിയ ബ്രോഡോ എന്തിന് നോണ്‍ സ്ട്രൈക്കര്‍ എന്‍ഡിലുണ്ടായിരുന്ന ഇന്ത്യന്‍ നായകന്‍ ധോണിയോ ചരിത്ര നിമിഷമാണ് പിറക്കാന്‍ പോകുന്നതെന്ന് സ്വപ്നത്തില്‍ പോലും കരുതിക്കാണില്ല. 19ാം ഓവറിലെ ഒന്നാം പന്ത് ബ്രോഡ് എറിഞ്ഞത് മുതല്‍ അവസാന പന്ത് പൂര്‍ത്തിയാക്കി തലതാഴ്ത്തി മടങ്ങുന്നതുവരെ കുറ്റബോധം നിഴലിച്ചിരുന്നത് ഫ്ലിന്‍റോഫിന്‍റെ മുഖത്തായിരുന്നു.

പ്രഥമ ടി20 ലോകകപ്പിലെ സൂപ്പര്‍ സിക്സ് പോരാട്ടത്തില്‍ ഇന്ത്യക്ക് ഏറെ നിര്‍ണായകമായിരുന്നു സെപ്റ്റംബര്‍ 19 നു നടന്ന ആ മത്സരം. ജയിച്ചേ മതിയാകു എന്ന നിലയില്‍ കളത്തിലിറങ്ങിയ ഇന്ത്യക്ക് വീരേന്ദർ സേവാഗും (68), ഗൗതം ഗംഭീറും (58) ചേർന്ന് മികച്ച തുടക്കമാണ് നല്‍കിയത്. പിന്നാലെയെത്തിയ റോബിൻ ഉത്തപ്പ ആറ് റൺസെടുത്ത് മടങ്ങിയപ്പോള്‍ ധോണിയെ കാഴ്ചക്കാരനാക്കി യുവരാജ് ചരിത്രമെഴുതുകയായിരുന്നു.


ധോണി എട്ട് പന്തില്‍ നിന്ന് വെറും 10 റണ്‍സെടുത്ത മത്സരത്തില്‍ 16 പന്തുകള്‍ നേരിട്ട യുവി ഫ്ലിന്‍റോഫിന് തന്നെ വിക്കറ്റ് നല്‍കി മടങ്ങുമ്പോഴേക്കും സ്വന്തംപേരില്‍ കുറിച്ചത് 58 റണ്‍സായിരുന്നു. തുടര്‍ച്ചയായ ആറു സിക്സറുകള്‍ ഉള്‍പ്പെടെ 12 പന്തിലാണ് യുവി 50 കടന്നത്. ടീം 20 ഓവറില്‍ നാല് വിക്കറ്റ് നഷ്ടത്തില്‍ നേടിയത് 218 റണ്‍സും.

പിന്നീട് ആ ഇന്നിങ്സിനെക്കുറിച്ച് സംസാരിച്ച യുവിയും പറഞ്ഞത് തനിക്ക് പ്രചോദനമായത് ഫ്ലിന്‍റോഫിന്‍റെ വാക്കുകളായിരുന്നു എന്നാണ്. 'അത്തരം കമന്റുകൾ അറിയാതെതന്നെ നമ്മളെ ഒന്നു ചാർജ് ചെയ്യും. തിരിച്ചുകൊടുക്കാൻ മനസ്സും കൈയും തരിക്കും', എന്നായിരുന്നു ചരിത്രനിമിഷത്തെക്കുറിച്ചുള്ള സിക്സര്‍ രാജിന്‍റെ പ്രതികരണം.