ക്രിസ് ഗെയിലിന്‍റെ ആദ്യത്തെ കൺമണിക്ക് പേരിട്ടത് വിവാദമായി

ക്രീസിലെ വെടിക്കെട്ട് വീരന്‍ ക്രിസ് ഗെയിലിന് ഒരു പെണ്‍കുഞ്ഞ് പിറന്ന വാര്‍ത്ത ക്രിക്കറ്റ് ലോകം കൊണ്ടാടുകയാണ്. ഇതിനിടയില്‍ മകള്‍ക്ക് മനോഹരമായ ഒരു പേരിട്ട് പുലിവാൽ പിടിച്ചിരിക്കുകയാണ് ഗെയിൽ. ലജ്ജ കൊണ്ട് തുടുത്ത മുഖമെന്ന് അർത്ഥം വരുന്ന ബ്ലഷ് എന്നാണ് പേരിട്ടിരിക്കുന്നത്.



ക്രിസ് ഗെയില്‍ മകള്‍ക്ക് ഈ പേര് തെരഞ്ഞെടുത്തതിന് പിന്നില്‍ ഒരു സംഭവമുണ്ട്. ഈ വര്‍ഷം ജനുവരിയില്‍ ഓസ്‌ട്രേലിയന്‍ ട്വന്റി-20 ലീഗായ ബിഗ് ബാഷില്‍ കളിക്കുന്ന സമയം. ഹൊബാര്‍ട്ട് ഹാരികെയ്‌നെതിരേ മെല്‍ബണ്‍ റെനെഗെഡ്‌സിനുവേണ്ടി ബാറ്റു ചെയ്തു തിരിച്ചെത്തിയ ഗെയ്‌ലിനെ ഇന്റര്‍വ്യൂ ചെയ്യാന്‍ ചാനല്‍ 10 ന്റെ വനിത റിപ്പോര്‍ട്ടര്‍ മഗലിന്‍ എത്തി. സുന്ദരിയായ റിപ്പോര്‍ട്ടറുടെ ചോദ്യങ്ങള്‍ക്കുത്തരമെല്ലാം പറഞ്ഞവസാനിപ്പിച്ച ഗെയിൽ കളി കഴിഞ്ഞശേഷം തനിക്കൊപ്പം മദ്യപിക്കാന്‍ വരുന്നുണ്ടോയെന്നു ചോദിച്ചു. നാണക്കേടു കൊണ്ട് മുഖംകുനിച്ചുനിന്ന റിപ്പോര്‍ട്ടറോട് ഗെയിൽ ഇത്രയും കൂടി പറഞ്ഞു. ‘ഡോണ്ട് ബ്ലഷ് ബേബി’.



സംഭവം വിവാദമായതോടെ ഗെയ്‌ലിനെതിരേ വലിയ വിമര്‍ശനങ്ങളുയര്‍ന്നു. സോഷ്യല്‍ മീഡിയയില്‍ ബ്ലഷ് ബേബി വിളികളുടെ പേരില്‍ ട്രോളര്‍മാര്‍ ഗെയ്‌ലിനെ പരിഹസിച്ചു. ക്രിക്കറ്റ് ഓസ്‌ട്രേലിയ സംഭവത്തില്‍ ഇടപെടുകയും താരത്തിനു ആറു ലക്ഷം രൂപ പിഴ ഈടാക്കുകയും ചെയ്തു. റിപ്പോര്‍ട്ടറോട് ഗെയില്‍ മാപ്പ് ചോദിക്കുകയും ചെയ്തു. ഇതേ വാക്കാണ് കുഞ്ഞിനും പേരാക്കിയിരിക്കുന്നത്. ഐപിഎല്ലില്‍ റോയല്‍ ചലഞ്ചേഴ്‌സ് താരമായ ഗെയിൽ ഇപ്പോള്‍ അമ്മ താഹയ്ക്കും കുഞ്ഞിനുമൊപ്പം ജമൈക്കയിലാണ്. ഫേസ്ബുക്കിൽ താരം കുഞ്ഞിന്‍റെ പേര് പങ്കുവെച്ചിട്ടുമുണ്ട്.