രവി ശാസ്ത്രി പരിശീലകനായി തുടരണോ? കോഹ‍്‍ലിയുടെ ഉത്തരം ഇങ്ങനെ!

ന്യൂഡൽഹി: ലോകകപ്പ് പരാജയത്തിന് ശേഷം ഇന്ത്യൻ പരിശീലകൻ രവി ശാസ്ത്രിക്കെതിരെ വിമർശനം ഉയർന്നിരുന്നു. വെസ്റ്റ് ഇൻഡീസ് പര്യടനം വരെ ശാസ്ത്രിക്കും സപ്പോർട്ട് സ്റ്റാഫിനും കരാർ കാലാവധി നീട്ടി നൽകിയിട്ടുണ്ട്. നിലവിൽ ബിസിസിഐ ഇന്ത്യൻ പരിശീലന സ്ഥാനത്തേക്ക് പുതിയ അപേക്ഷകൾ ക്ഷണച്ചിരിക്കുകയാണ്. എന്നാൽ ലോകകപ്പ് സെമിയിലെ പരാജയത്തിൻെറ പേരിൽ രവി ശാസ്ത്രിയെ മാറ്റരുതെന്നാണ് തൻെറ അഭിപ്രായമെന്ന് ടീം നായകൻ വിരാട് കോഹ‍്‍ലി.

"കപിൽ ദേവിൻെറ അധ്യക്ഷതയിലുള്ള ഉന്നതാധികാര സമിതി ഇക്കാര്യത്തിൽ ഇത് വരെ അഭിപ്രായം ചോദിച്ചിട്ടില്ല. എന്നാൽ ടീമിൽ എല്ലാവരുമായും അദ്ദേഹത്തിന് (രവി ശാസ്ത്രിക്ക്) വളരെ നല്ല ബന്ധമാണുള്ളത്. അദ്ദേഹം തന്നെ തുടരുന്നതായിരിക്കും സന്തോഷം പകരുന്ന കാര്യം," കോച്ചിനെ നിയമിക്കുന്നതുമായി ബന്ധപ്പെട്ട കാര്യത്തിൽ കോഹ‍്‍ലി പറഞ്ഞു. തിങ്കളാഴ്ച മാധ്യമപ്രവർത്തകരോട് സംസാരിക്കവേയാണ് അദ്ദേഹം ഇക്കാര്യം വ്യക്തമാക്കിയത്. എന്നാൽ ക്രിക്കറ്റ് അഡ്വൈസറി കമ്മിറ്റിയാണ് ഇക്കാര്യത്തിൽ അന്തിമ തീരുമാനം എടുക്കേണ്ടതെന്നും കോഹ‍്‍ലി കൂട്ടിച്ചേർത്തു.

Read More: കോഹ‍്‍ലിയുടെ ക്യാപ്റ്റൻസി കാലാവധി കഴിഞ്ഞു, സെലക്ട‍ർമാ‍ർ വിധേയത്വം കാണിക്കരുത്: ഗവാസ‍്‍കർ

കോഹ‍്‍ലിയും രവി ശാസ്ത്രിയും വളരെ നല്ല അടുപ്പം സൂക്ഷിക്കുന്നവരാണ്. കോഹ‍്‍ലിയാണ് ശാസ്ത്രിയെ ഇന്ത്യൻ പരിശീലക സ്ഥാനത്തെത്തിക്കുന്നതിൽ നിർണായക പങ്ക് വഹിച്ചിരുന്നത്. ടീമുമായി ബന്ധപ്പെട്ടും മറ്റും നിരവധി ഊഹാപോഹങ്ങൾ പ്രചരിക്കുന്നുണ്ടെങ്കിലും ഇപ്പോഴും ഇരുവരും തമ്മിൽ പരസ്പര ധാരണയോടെ തന്നെയാണ് മുന്നോട്ട് പോവുന്നത്. ഇത്തവണ പരിശീലകനെ നിയമിക്കുന്ന കാര്യത്തിൽ കോഹ്ലിയുടെ അഭിപ്രായം ചോദിക്കില്ലെന്നാണ് സൂചന.