ഏഷ്യയിൽ ഈ റെക്കോർഡ് ഒരേയൊരു നായകന് മാത്രം സ്വന്തം

ന്യൂഡൽഹി: ഇന്ത്യൻ നായകൻ വിരാട് കോഹ‍്‍ലിയുടെ തൊപ്പിയിൽ ഒരു പൊൻതൂവൽ കൂടി. ഓസ്ട്രേലിയയിൽ ആദ്യ മത്സരത്തിൽ തന്നെ വിജയം നേടി ടെസ്റ്റ് പരമ്പരയിൽ ഇന്ത്യ മേൽക്കൈ നേടിയിരിക്കുകയാണ്. ഈ വിജയത്തോടെ ഒരു അത്യപൂർവ നേട്ടം കോഹ‍്‍ലി സ്വന്തമാക്കി.

ഓസ്ട്രേലിയയിലും ഇംഗ്ലണ്ടിലും ദക്ഷിണാഫ്രിക്കയിലും ടെസ്റ്റ് വിജയിക്കുന്ന ആദ്യ ഏഷ്യൻ നായകനാണ് കോഹ‍്‍ലി. മുൻ ഇന്ത്യൻ നായകൻമാരായിരുന്ന എംഎസ് ധോണിയും രാഹുൽ ദ്രാവിഡും ഇംഗ്ലണ്ടിലും ദക്ഷിണാഫ്രിക്കയിലും ടെസ്റ്റ് മത്സരങ്ങൾ വിജയിച്ചിരുന്നു. എന്നാൽ ഓസ്ട്രേലിയയിൽ ജയിച്ചിരുന്നില്ല.

അനിൽ കുംബ്ലെക്ക് ശേഷം ഓസ്ട്രേലിയയിൽ വിജയം നേടുന്ന ആദ്യ ഇന്ത്യൻ നായകനാണ് കോഹ‍്‍ലി. 2003ൽ ഗാംഗുലിയുടെ നേതൃത്വത്തിൽ ഓസീസ് മണ്ണിൽ ഇന്ത്യ ടെസ്റ്റ് മത്സരം വിജയിച്ചിരുന്നു.