ICC Rankings: ഒന്നാം സ്ഥാനം നിലനിർത്തി കോഹ‍്‍ലിയും ബുംറയും

ദുബായ്: എെസിസിയുടെ ഏറ്റവും പുതിയ ഏകദിന ക്രിക്കറ്റ് റാങ്കിങിൽ ബാറ്റിങിലും ബോളിങിലും ഒന്നാം സ്ഥാനം നിലനിർത്തി ഇന്ത്യൻ താരങ്ങൾ. ബാറ്റ്സ്മാൻമാരുടെ പട്ടികയിൽ ഇന്ത്യൻ നായകൻ വിരാട് കോഹ‍്‍ലിയാണ് ഒന്നാമത്. ബോളർമാരുടെ പട്ടികയിൽ പേസർ ജസ്പ്രീത് ബുംറ ഒന്നാം സ്ഥാനം നില നിർത്തി.

899 പോയിൻറുമായാണ് കോഹ‍്‍ലി ഒന്നാം റാങ്ക് നില നിർത്തിയത്. ബാറ്റ്സ്മാൻമാരിൽ ഇന്ത്യൻ ഉപനായകൻ രോഹിത് ശർമ്മയാണ് രണ്ടാമത്. ശിഖർ ധവാനാണ് ആദ്യ പത്തിലുള്ള മറ്റൊരു ഇന്ത്യൻ ബാറ്റ്സ്മാൻ. എട്ടാം സ്ഥാനത്താണ് അദ്ദേഹം. മുൻ ക്യാപ്റ്റൻ എംഎസ് ധോണി 20ാം സ്ഥാനത്തുണ്ട്.

841 പോയിൻറുമായാണ് ബോളർമാരുടെ പട്ടികയിൽ ബുംറ ഒന്നാമതെത്തിയത്. കുൽദീപ് യാദവ് മൂന്നാം സ്ഥാനത്തുണ്ട്. അഫ്ഗാനിസ്ഥാൻ താരം റാഷിദ് ഖാനാണ് ഓൾ റൗണ്ടർമാരുടെ പട്ടികയിൽ ഒന്നാമത്. ടീം റാങ്കിങിൽ ഇന്ത്യ, ഇംഗ്ലണ്ടിന് പിറകിൽ രണ്ടാം സ്ഥാനത്താണുള്ളത്.