ഐസിസി ടെസ്റ്റ് റാങ്കിങ് പ്രഖ്യാപിച്ചു; ഒന്നാം സ്ഥാനം നിലനിർത്തി ഇന്ത്യ

ഐസിസി പുറത്തിറക്കിയ ഏറ്റവും പുതിയ ഐസിസി റാങ്കിങിൽ ഇന്ത്യ ഒന്നാം സ്ഥാനം നിലനിർത്തി. 121 പോയൻറുമായാണ് ഇന്ത്യ ഒന്നാം സ്ഥാനത്ത് നിലനിൽക്കുന്നത്. തുടർച്ചയായി അഞ്ചാം വർഷമാണ് ഇന്ത്യ ടെസ്റ്റ് റാങ്കിങിൽ ഒന്നാം സ്ഥാനത്ത് നിൽക്കുന്നത്. ലോക ടെസ്റ്റ് ചാമ്പ്യൻഷിപ്പ് ഫൈനലിലെ ഇന്ത്യയുടെ എതിരാളികളായ ന്യൂസിലൻറാണ് രണ്ടാം സ്ഥാനത്തുള്ളത്. ഇന്ത്യയേക്കാൾ ഒരു പോയൻറ് മാത്രമാണ് കുറവുള്ളത്.

ഓസ്ട്രേലിയയെ പിന്തള്ളി ഇംഗ്ലണ്ട് മൂന്നാം സ്ഥാനത്തെത്തി. 108 പോയൻറുമായി നാലാം സ്ഥാനത്താണ് ഓസ്ട്രേലിയ. പാകിസ്ഥാനാണ് അഞ്ചാം സ്ഥാനത്ത്. രണ്ട് സ്ഥാനങ്ങൾ മുന്നോട്ട് കയറിയ വെസ്റ്റ് ഇൻഡീസ് ആറാം സ്ഥാനത്തെത്തി.

Also Read: അവൻ മികച്ച ക്യാപ്റ്റനാവും, സംശയം വേണ്ട; ഇന്ത്യൻ യുവതാരത്തെ പുകഴ്ത്തി ഗാവസ്കർ

ഓസ്ട്രേലിയയെ അവരുടെ നാട്ടിൽ 3-1ന് പരാജയപ്പെടുത്തിയതും ഇംഗ്ലണ്ടിനെ നാട്ടിൽ 2-1ന് തോൽപ്പിച്ചതുമാണ് ഇന്ത്യയുടെ നേട്ടത്തിന് കാരണമായത്. ബംഗ്ലാദേശിനെ 2-0ന് തോൽപ്പിക്കുകയും ശ്രീലങ്കയുമായി സമനില നേടിയതുമാണ് വെസ്റ്റ് ഇൻഡീസിനെ രണ്ട് സ്ഥാനം മുന്നിലെത്തിച്ചത്. ദക്ഷിണാഫ്രിക്ക, ശ്രീലങ്ക, ബംഗ്ലാദേശ് എന്നീ ടീമുകൾ പോയൻറ് പട്ടികയിൽ അവസാന സ്ഥാനങ്ങളിലാണുള്ളത്.