നിലവിൽ ലോക ക്രിക്കറ്റിൽ ഏറ്റവും മികച്ച ബാറ്റ്സ്മാൻ ആരെന്ന ചോദ്യത്തിന് എത്തുന്ന ഉത്തരം വിരാട് കോലിയോ സ്റ്റീവ് സ്മിത്തോ എന്നതാണ്. മൂന്ന് ഫോർമാറ്റും പരിഗണിക്കുമ്പോൾ കോലിയെന്നും എന്നാൽ ടെസ്റ്റ് മാത്രം പരിഗണിക്കുമ്പോൾ സ്മിത്തെന്നും വിലയിരുത്തുന്നവരുണ്ട്. ക്രിക്കറ്റിൽ മികച്ചവൻ ആരെന്ന ചോദ്യത്തിന് കണക്കുകൾ ഉത്തരം പറയും.
സ്റ്റീവ് സ്മിത്താണോ വിരാട് കോലിയാണോ ലോകത്തിൽ നിലവിലെ ഏറ്റവും മികച്ച ടെസ്റ്റ് ബാറ്റ്സ്മാൻ... കണക്കുകൾ നോക്കാം....
കോലിയുടെ ടെസ്റ്റ് റെക്കോർഡ്
ലോക ടെസ്റ്റ് റാങ്കിങിൽ നിലവിൽ രണ്ടാം സ്ഥാനത്താണ് ഇന്ത്യൻ നായകൻ വിരാട് കോലി. 86 ടെസ്റ്റ് മത്സരങ്ങൾ കളിച്ചിട്ടുള്ള കോലി 145 ഇന്നിങ്സുകളിൽ നിന്നായി 7240 റൺസെടുത്തിട്ടുണ്ട്. 53.6 ശരാശരിയുള്ള താരത്തിൻെറ ഉയർന്ന ടെസ്റ്റ് സ്കോർ പുറത്താവാതെ നേടിയ 254 റൺസാണ്. 27 സെഞ്ച്വറികളും 22 അർധ സെഞ്ച്വറികളും അദ്ദേഹം നേടിയിട്ടുണ്ട്. 57.7 ആണ് കോലിയുടെ സ്ട്രൈക് റേറ്റ്.
സ്റ്റീവ് സ്മിത്തിൻെറ കരിയർ റെക്കോർഡ്
മുൻ ഓസ്ട്രേലിയൻ നായകനായ സ്റ്റീവ് സ്മിത്ത് ഐസിസി ടെസ്റ്റ് റാങ്കിങിൽ ഒന്നാമനാണ്. 73 ടെസ്റ്റ് മത്സരങ്ങളിലെ 131 ഇന്നിങ്സുകളിൽ നിന്നായി അദ്ദേഹം 7227 റൺസെടുത്തിട്ടുണ്ട്. 62.8 ശരാശരിയുള്ള സ്മിത്തിൻെറ ഉയർന്ന ടെസ്റ്റ് സ്കോർ 239 ആണ്. 26 സെഞ്ച്വറികളും 29 അർധ സെഞ്ച്വറികളും അദ്ദേഹം നേടിയിട്ടുണ്ട്. 55.3 ആണ് താരത്തിൻെറ ടെസ്റ്റിലെ സ്ട്രൈക് റേറ്റ്. നേരത്തെ ഓസീസ് നായകനായിരുന്ന താരത്തിന് പന്ത് ചുരണ്ടൽ വിവാദത്തിന് ശേഷമാണ് സ്ഥാനം നഷ്ടമായത്. ഒരു വർഷം ക്രിക്കറ്റിൽ നിന്ന് വിലക്കും നേരിട്ടിരുന്നു.
2019ലെ ബാറ്റിങ് കണക്കുകൾ
2019ൽ ഇവരിൽ ആരായിരുന്നു കേമനെന്ന് കണക്കുകളിലൂടെ പരിശോധിക്കാം. 74.23 ശരാശരിയുമായി സ്മിത്ത് ഒന്നാം സ്ഥാനത്ത് തന്നെയുണ്ട്. ഇന്ത്യൻ ഉപനായകൻ അജിങ്ക്യ രഹാനെ (71.33), മായങ്ക് അഗർവാൾ (68.54), ബാബർ അസം (68.44) എന്നിവർക്ക് പിന്നിൽ നാലാമനാണ് വിരാട് കോലി. 68.00 ആണ് 2019ലെ കോലിയുടെ ബാറ്റിങ് ശരാശരി. നിലവിലുള്ള ബാറ്റിങ് ശരാശരി കണക്കിലെടുക്കുമ്പോൾ കോലി സ്മിത്തിനും പിന്നിലാണ്.
സ്റ്റീവ് സ്മിത്ത് തന്നെ നിലവിൽ ഒന്നാമൻ
കരിയർ റെക്കോർഡ്, ടെസ്റ്റ് റാങ്കിങ്, ഈ അടുത്ത കാലത്തെ ബാറ്റിങ് ശരാശരി എന്നിവയെല്ലാം കണക്കിലെടുക്കുമ്പോൾ സ്റ്റീവ് സ്മിത്ത് തന്നെയാണ് വിരാട് കോലിക്ക് ഒരു പടി മുന്നിലെന്ന് മനസ്സിലാവും. 2019ലെ ആഷസ് പരമ്പര ഓസ്ട്രേലിയക്ക് നിർണായകമായിരുന്നു. ഇംഗ്ലണ്ടിൽ സ്മിത്ത് നടത്തിയത് അവിസ്മരണീയ പ്രകടനമായിരുന്നു. വിരാട് കോലിയെ സംബന്ധിച്ചിടത്തോളം ഈയടുത്ത് നടന്ന ന്യൂസിലൻറ് പര്യടനം വെല്ലുവിളി നിറഞ്ഞതായിരുന്നു. പരമ്പരയിൽ താരം ദയനീയ പരാജയമായിരുന്നു. ഏതായാലും 2020ൽ ഇത് വരെയുള്ള കണക്കുകൾ എടുക്കുമ്പോൾ സ്റ്റീവ് സ്മിത്ത് തന്നെയാണ് ഒന്നാമൻ...