ധോണിയുടെ മികവിന് കാരണം കോഹ്‍ലി: ഗാംഗുലി

ന്യൂഡല്‍ഹി: മുന്‍ ഇന്ത്യന്‍ ക്യാപ്റ്റൻ മഹേന്ദ്ര സിങ് ധോണിയുടെ മികച്ച പ്രകടനത്തിനു കാരണം വിരാട് കോഹ്‍ലിയാണെന്ന് മുന്‍ താരം സൗരവ് ഗാംഗുലി. ഓസ്ട്രേലിയക്കെതിരായ ആദ്യ ഏകദിന മത്സത്തിലെ മികച്ച പ്രകടനത്തിനുശേഷം ഇന്ത്യാ ടുഡേയോടാണ് ഗാംഗുലി അഭിപ്രായപ്രകടനം നടത്തിയത്.

ഇത് ക്യാപ്റ്റന്‍റെ വിശ്വാസമാണ്. വിരാട് കോഹ്ലി ധോണിയില്‍ ഏറെ വിശ്വാസം അര്‍പ്പിച്ചിട്ടുണ്ട്. അതുകൊണ്ടാണ് ധോണിക്ക് അദ്ദേഹം ആഗ്രഹിക്കുന്ന രീതിയില്‍ കളിക്കാന്‍ പറ്റുന്നത്. അതിന് കോഹ്ലിയെ അഭിനന്ദിച്ചേ മതിയാകൂ, മുന്‍ ഇന്ത്യന്‍ ക്യാപ്റ്റന്‍കൂടിയായ ഗാംഗുലി പറഞ്ഞു.

ധോണിയെപ്പോലെ 300 ഏകദിന മത്സരങ്ങളൊക്കെ കളിച്ചയാള്‍ക്ക് എങ്ങനെ റണ്‍സ് എടുക്കണമെന്ന് നിശ്ചയമുണ്ടാകും. ധോണി ഇതുവരെ അന്താരാഷ്ട്ര മത്സരങ്ങളില്‍നിന്ന് 9000ത്തിലധികം റണ്‍സ് നേടിയിട്ടുണ്ട്. വിരമിക്കുന്നതിനു മുന്‍പ് ഇനിയുമേറെ റണ്‍സ് നേടാന്‍ അദ്ദേഹത്തിനു കഴിയും, ഗാംഗുലി കൂട്ടിച്ചേര്‍ത്തു.

ഓസ്ട്രേലിയക്കെതിരായ മത്സരത്തില്‍ ടീം പ്രതിസന്ധിയിലായിരിക്കുമ്പോളായിരുന്നു ധോണിയുടെ മികച്ച ഇന്നിങ്‍സ്. 79 റണ്‍സാണ് ധോണി മത്സരത്തില്‍ നേടിയത്. ഇത് ഇന്ത്യന്‍ വിജയത്തില്‍ നിര്‍ണായകമാവുകയും ചെയ്‍തു. അടുത്തിടെ സമാപിച്ച ശ്രീലങ്കന്‍ പര്യടനത്തിലും ധോണി മികച്ച പ്രകടനം നടത്തിയിരുന്നു. പരമ്പരയിലെ രണ്ട് മത്സരങ്ങളാണ് ഇന്ത്യ ധോണിയുടെ കരുത്തില്‍ വിജയിച്ചത്.

Virat Kohli Responsible For What We Are Seeing Of MS Dhoni, Says Sourav Ganguly

After Dhoni's latest knock against Australia, former India captain Sourav Ganguly applauded Kohli for showing faith in him.