രോഹിത് മികച്ച ക്യാപ്റ്റൻ; വാനോളം പുകഴ്ത്തി ലക്ഷ്മൺ

ന്യൂഡൽഹി: രോഹിത് ശർമ്മയുടെ നേതൃത്വത്തിൽ വെസ്റ്റ് ഇൻഡീസിനെതിരായ ട്വൻറി20 പരമ്പര ഇന്ത്യ 3-0ന് തൂത്തുവാരിയിരിക്കുകയാണ്. ടി20യിൽ മികച്ച താരങ്ങളുള്ള നിരയാണ് വിൻഡീസിൻേറത്. എന്നാൽ ഇന്ത്യക്കെതിരെ അവർ മൂന്ന് മത്സരങ്ങളിലും അമ്പേ പരാജയപ്പെടുകയായിരുന്നു.

രോഹിത് ശർമ്മയുടെ ക്യാപ്റ്റൻസി ഇന്ത്യൻ വിജയത്തിൽ പ്രധാന പങ്ക് വഹിച്ചെന്നാണ് മുൻ ഇന്ത്യൻ താരം വി.വി.എസ് ലക്ഷ്മണിൻെറ വിലയിരുത്തൽ. "രോഹിതിൻെറ ക്യാപ്റ്റൻസി ഏറെ പ്രതീക്ഷ നൽകുന്നു. ട്വൻറി20യിൽ അദ്ദേഹം ഇന്ത്യക്ക് മികച്ച വിജയങ്ങൾ സമ്മാനിച്ച് കഴിഞ്ഞു," ടൈംസ് ഓഫ് ഇന്ത്യയിലെ കോളത്തിൽ ലക്ഷ്മൺ എഴുതി.

"വ്യക്തമായ പ്ലാനുമായാണ് അദ്ദേഹം ഉത്തരവാദിത്വം ഏറ്റെടുക്കുന്നത്. ഫീൽഡിൽ മറ്റ് താരങ്ങൾക്ക് ഊർജ്ജം പകരുന്നതിലും രോഹിത് മാതൃകയാണ്. മികച്ച പരീക്ഷണങ്ങൾ നടത്തുന്നതിലും വിജയിപ്പിക്കുന്നതിലും അദ്ദേഹത്തിന് കഴിവുണ്ട്," ലക്ഷ്മൺ കൂട്ടിച്ചേർത്തു.

വിൻഡീസിനെതിരായ പരമ്പരയിൽ ബാറ്റിങിലും രോഹിത് ശർമ്മ ഉജ്വല ഫോമിലായിരുന്നു. ടി20 ക്രിക്കറ്റിൻെറ ചരിത്രത്തിൽ നാല് സെഞ്ച്വറികൾ നേടുന്ന ആദ്യതാരമായും അദ്ദേഹം മാറി.