ഓപ്പണിങിൽ രോഹിതും രാഹുലും ഇറങ്ങും
ഓപ്പണർ ശിഖർ ധവാന് പരിക്കേറ്റത് പരമ്പരക്ക് തൊട്ട് മുമ്പ് ഇന്ത്യക്ക് തിരിച്ചടിയായിരിക്കുകയാണ്. രോഹിത് ശ‍ർമക്കൊപ്പം കെഎൽ രാഹുലായിരിക്കും ഇന്ത്യൻ ഇന്നിങ്സ് ഓപ്പൺ ചെയ്യുകയെന്നാണ് സൂചന. രാഹുലിനെ സംബന്ധിച്ചിടത്തോളം ഇത് നി‍ർണായക പരമ്പരയാണ്. ബംഗ്ലാദേശിനെതിരെ രണ്ടാം ടി20യിലെ പ്രകടനത്തോടെ താരം പ്രതീക്ഷ നൽകിയിട്ടുണ്ടെങ്കിലും ടീമിലെ പ്രധാന ബാറ്റ്സ്മാൻ എന്ന നിലയിൽ താരത്തിൽ നിന്ന് ഇന്ത്യ അൽപം കൂടെ പ്രതീക്ഷിക്കുന്നുണ്ട്.
മധ്യനിരയിൽ വിരാട്, ശ്രേയസ്, റിഷഭ് പന്ത്
ചെറിയ ഇടവേളക്ക് ശേഷം മടങ്ങിയെത്തുന്ന നായകൻ വിരാട് കോലി തന്നെയായിരിക്കും മൂന്നാമനായി ഇറങ്ങുക. ശ്രേയസ് അയ്യരാണ് ലിമിറ്റഡ് ഓവ‍ർ ക്രിക്കറ്റിൽ നാലാം നമ്പറിലെന്ന് ടീം മാനേജ്മെൻറ് ഉറപ്പിച്ച് കഴിഞ്ഞിട്ടുണ്ട്. അവസാന രണ്ട് ടി20 പരമ്പരകളിലും ശ്രേയസ് മികച്ച ബാറ്റിങ് പ്രകടനമാണ് കാഴ്ച വെച്ചത്. വിക്കറ്റ് കീപ്പറായ റിഷഭ് പന്തായിരിക്കും മധ്യനിരയിലെ മറ്റൊരു താരം.
ഓൾ റൗണ്ട‍ർമാരായി ജഡേജയും ദുബെയും
ഹാ‍ർദിക് പാണ്ഡ്യയുടെ അസാന്നിധ്യത്തിൽ പുതുമുഖ താരം ശിവം ദുബെയെ ഇന്ത്യ ഇറക്കാനാണ് സാധ്യത. ബംഗ്ലാദേശിനെതിരെ ദുബെ പ്രതീക്ഷ നൽകിയിരുന്നു. മികച്ച ഫോമിലുള്ള രവീന്ദ്ര ജഡേജയും ടി20 ടീമിലേക്ക് തിരികെയെത്തിയേക്കും.
കുൽചാ വീണ്ടുമെത്തുമോ ? ചാഹറും ഭുവനേശ്വറും സ്ഥാനമുറപ്പിക്കും
ബംഗ്ലാദേശിനെതിരെ റെക്കോർഡ് പ്രകടനം നടത്തിയ ദീപക് ചാഹറായിരിക്കും ഒന്നാം ടി20യിൽ ഇന്ത്യയുടെ പേസ് ആയുധം. ടീമിൽ തിരിച്ചെത്തുന്ന സീനിയർ താരം ഭുവനേശ്വർ കുമാറും ഒപ്പമുണ്ടാവും. ആദ്യ മത്സരത്തിൽ മുഹമ്മദ് ഷമിയെ ഉൾപ്പെടുത്താനുള്ള സാധ്യതകൾ കുറവാണ്. കുൽദീപ് യാദവും യുസ‍്‍വേന്ദ്ര ചാഹലും സാഹചര്യങ്ങൾക്ക് അനുസരിച്ച് ടീമിൽ സ്ഥാനം പിടിക്കും. ഏതായാലും വാഷിങ്ടൺ സുന്ദറിനെ ഒന്നാം ടി20യിൽ കളിപ്പിക്കില്ല.
സഞ്ജു സാംസൺ കളിക്കുമോ...
ബംഗ്ലാദേശിനെതിരെയുള്ള ടി20 പരമ്പരയിൽ വിരാട് കോലിക്ക് പകരക്കാരനായാണ് സഞ്ജു സാംസൺ ടീമിൽ ഇടം പിടിച്ചിരുന്നത്. ഇത്തവണ ഓപ്പണർ ശിഖർ ധവാന് പകരക്കാരനായാണ് സഞ്ജുവിൻെറ വരവ്. ഒന്നാം ടി20യിൽ സഞ്ജു പ്ലേയിങ് ഇലവനിലെത്താനുള്ള സാധ്യതകൾ കുറവാണ്. മധ്യനിരയിൽ ഒരു ബാറ്റ്സ്മാനെ കൂടി ഉൾപ്പെടുത്തുകയാണെങ്കിൽ തന്നെ അത് മനീഷ് പാണ്ഡെയായിരിക്കും.