ധവാൻ ഇല്ല, രാഹുലായിരിക്കും ഓപ്പണർ
ശിഖർ ധവാൻ ഇല്ലാത്ത സാഹചര്യത്തിൽ രോഹിത് ശർമക്കൊപ്പം കെഎൽ രാഹുലായിരിക്കും ടീമിൻെറ ഓപ്പണർ. നേരത്തെ അവസാനിച്ച ടി20 പരമ്പരയിൽ രാഹുൽ രണ്ട് അർധശതകങ്ങൾ നേടിയിരുന്നു. ധവാന് പകരം മായങ്ക് അഗർവാളാണ് പതിനഞ്ചംഗ ടീമിലുള്ളത്.
മധ്യനിരയിൽ നാലാം നമ്പറിൽ ശ്രേയസ് അയ്യർ
ഏകദിനത്തിൽ ശ്രേയസ് അയ്യരെയാണ് ഇന്ത്യ നാലാം നമ്പറിൽ പരിഗണിക്കുന്നത്. ലോകകപ്പിൽ നാലാം നമ്പറായിരുന്നു ഇന്ത്യയുടെ വലിയ തലവേദന. ടി20യിലെ അതേ ലൈനപ്പ് തന്നെയായിരിക്കും മധ്യനിരയിൽ ഉണ്ടാവുക. വിരാട് കോലി മൂന്നാം നമ്പറിലും റിഷഭ് പന്ത് അഞ്ചാം നമ്പറിലും കളിക്കാനാണ് സാധ്യത.
രണ്ട് ഓൾറൗണ്ടർമാർ കളിച്ചേക്കും
മികച്ച ഫോമിലുള്ള രവീന്ദ്ര ജഡേജയും ശിവം ദുബെയും ഓൾറൗണ്ടർമാർ എന്ന നിലയിൽ ടീമിലുണ്ടാവും. വിൻഡീസിനെതിരെ നടന്ന രണ്ടാം ടി20യിൽ ദുബെ വെടിക്കെട്ട് അർധശതകം നേടിയിരുന്നു. മൂന്ന് സ്പിന്നർമാരായിരിക്കും ടീമിൽ ഉണ്ടാവു, ഇതിൽ ഒരാളായിരിക്കും ജഡേജ.
കുൽചാ സഖ്യം തിരിച്ചെത്തും
ഒരിടവേളക്ക് ശേഷം കുൽദീപ് യാദവ്, യുസ‍്‍വേന്ദ്ര ചാഹൽ സഖ്യം ഒരുമിച്ച് ടീമിൽ കളിക്കും. ചെന്നൈയിലെ സ്പിന്നിനെ അനുകൂലിക്കുന്ന പിച്ചിൽ ഇരുവരുടെയും പ്രകടനം ഇന്ത്യക്ക് മുൻതൂക്കം നൽകും.
ദീപക് ചാഹ‍റും ഷമിയും പേസർമാർ
പരമ്പരയിൽ ഭുവനേശ്വർ കുമാർ കൂടി ഇല്ലാത്തത് ഇന്ത്യക്ക് വലിയ തിരിച്ചടിയാണ്. മുഹമ്മദ് ഷമിയും ദീപക് ചാഹറുമായിരിക്കും പ്ലേയിങ് ഇലവനിൽ ഉണ്ടാവുക. ഭുവനേശ്വറിന് പകരം ശാർദൂൽ താക്കൂറാണ് പതിനഞ്ചംഗ ടീമിലുള്ളത്.