സ്മിത്ത് ചെയ്തത് വമ്പൻ മണ്ടത്തരമെന്ന് സൗരവ് ഗാംഗുലി

ന്യൂഡൽഹി: എന്ത് മോശം പ്രവൃത്തിയും ചെയ്ത് മത്സരം ജയിക്കണമെന്ന ഓസീസ് ക്രിക്കറ്റ് ടീമിൻെറ നിലപാട് ക്രിക്കറ്റ് ലോകത്തിന് നാണക്കേടാണെന്ന് മുൻ ഇന്ത്യൻ നായകൻ സൗരവ് ഗാംഗുലി. പന്ത് ചുരണ്ടൽ വിവാദത്തിൽ പ്രതികരിക്കുകയായിരുന്നു അദ്ദേഹം.

ദക്ഷിണാഫ്രിക്കക്കെതിരെ പന്തിൽ കൃത്രിമം കാണിച്ച് മത്സരം ജയിക്കാൻ ശ്രമിച്ച നായകൻ സ്റ്റീവ് സ്മിത്തിൻെറയും ഓസീസ് ടീമിൻെറയും പദ്ധതി ആന മണ്ടത്തരമായിപ്പോയി.

"സ്മിത്ത് അത് ചെയ്യാൻ പാടില്ലായിരുന്നു. ഡേവിഡ് വാർണറും, ബാൻ ക്രോഫ്റ്റും അടക്കം ആരെല്ലാം ഇതിൽ ഉൾപ്പെട്ടിട്ടുണ്ടോ അവരെല്ലാം ചെയ്തത് മണ്ടത്തരമാണ്," ഇന്ത്യ ടുഡെ ചാനലിൽ നടന്ന ചർച്ചയിൽ ഗാംഗുലി പറഞ്ഞു.

ദക്ഷിണാഫ്രിക്കക്കെതിരായ മൂന്നാം ടെസ്റ്റിൽ പന്തിൽ കൃത്രിമം കാണിച്ച സംഭവത്തിൽ പിടിക്കപ്പെട്ടതിനെ തുടർന്ന് സ്റ്റീവ് സ്മിത്ത് ഓസീസ് നായകസ്ഥാനം രാജി വെച്ചിരുന്നു.