സ്ത്രീധന പീഡനം: ബംഗ്ലാദേശ് ക്രിക്കറ്റ് താരത്തിനെതിരെ പരാതി

ധാക്ക: സ്ത്രീധന പീഡനക്കേസിൽ ബംഗ്ലാദേശ് ക്രിക്കറ്റ് താരം മൊസാദെക് ഹുസൈനെതിരെ പരാതി. താരത്തിനെതിരെ ഭാര്യ ഷർമിൻ ഷാമിറ ഉഷയാണ് പരാതി നൽകിയത്. ഏഷ്യാകപ്പിനുള്ള ബംഗ്ലാദേശ് ക്രിക്കറ്റ് ടീം അംഗമാണ് മൊസാദെക്.

സ്ത്രീധനത്തിൻെറ പേരിൽ തന്നെ മാനസികമായും ശാരീരികമായും പീഡിപ്പിക്കുന്നുവെന്നാണ് പരാതി. സംഭവത്തിൽ അഡീഷണൽ ചീഫ് ജുഡീഷ്യൽ മജിസ്ട്രേറ്റ് കോടതി അന്വേഷണത്തിന് ഉത്തരവിട്ടു. ബംഗ്ലാദേശിലെ ഒരു ടെലിവിഷൻ ചാനലാണ് വാർത്ത പുറത്ത് വിട്ടത്.

മൊസാദെക് ഭാര്യയെ കാലങ്ങളായി പീഡിപ്പിക്കുകയാണെന്ന് പരാതിയിൽ പറയുന്നുണ്ട്. ഭാര്യയെ വീട്ടിൽ നിന്ന് പുറത്താക്കിയതായും അഭിഭാഷകൻ കോടതിയെ അറിയിച്ചു. താരത്തിൻെറ ക്രിക്കറ്റ് കരിയറിനെ തന്നെ ബാധിക്കാവുന്ന വിവാദമാണിത്.

സംഭവവുമായി ബന്ധപ്പെട്ട് മൊസാദെക് ഇത് വരെ പ്രതികരിച്ചിട്ടില്ല. എന്നാൽ ഇരുവരുടെയും ദാമ്പത്യജീവിതത്തിൽ പ്രശ്നങ്ങൾ ഉണ്ടെന്നാണ് വീട്ടുകാരുടെ വെളിപ്പെടുത്തൽ.