മലേഷ്യ 27ന് പുറത്ത്: മിതാലി ഒറ്റയ്ക്ക് 97 റൺസ്!!

ന്യൂഡൽഹി: ഏഷ്യകപ്പ് വനിതാ ട്വൻറി20 ക്രിക്കറ്റിൽ മലേഷ്യക്കെതിരെ ഇന്ത്യക്ക് 142 റൺസിൻെറ തകർപ്പൻ വിജയം. മലേഷ്യയെ 13.4 ഓവറിൽ വെറും 27 റൺസിന് ഇന്ത്യ പുറത്താക്കി. ആറ് മലേഷ്യൻ താരങ്ങൾ പൂജ്യത്തിന് പുറത്തായി. ഇന്ത്യക്ക് വേണ്ടി മിതാലിരാജ് 69 പന്തിൽ നിന്ന് 97 റൺസെടുത്ത് പുറത്താവാതെ നിന്നു.

മത്സരത്തിൽ ആദ്യം ബാറ്റ് ചെയ്ത ഇന്ത്യ 20 ഓവറിൽ 3 വിക്കറ്റ് നഷ്ടത്തിൽ 169 റൺസെടുത്തു. മൂന്ന് റൺസിനാണ് മിതാലിക്ക് സെഞ്ച്വറി നഷ്ടമായത്. മറുപടി ബാറ്റിങിന് ഇറങ്ങിയ മലേഷ്യ ഇന്ത്യൻ ബോളിങ് കരുത്തിന് മുന്നിൽ തകർന്നടിയുകയായിരുന്നു.

ഇന്ത്യക്ക് വേണ്ടി പൂജ വസ്ത്രാകർ മൂന്ന് വിക്കറ്റ് വീഴ്ത്തി. അനൂജ പാട്ടീലും പൂനം യാദവും ഒരു റൺ പോലും വിട്ട് കൊടുക്കാതെ 2 വിക്കറ്റെടുത്തു. മലേഷ്യൻ നിരയിൽ ഒരാൾ പോലും രണ്ടക്കം കണ്ടില്ല. ഏഷ്യകപ്പ് വനിതാ ട്വൻറി20യിൽ ഇന്ത്യയുടെ ആദ്യ മത്സരമാണ് മലേഷ്യക്കെതിരെ നടന്നത്.