സെഞ്ചൂറിയനിൽ നാണക്കേടിൻെറ റെക്കോർഡുകളുമായി ചാഹൽ

സെഞ്ചൂറിയൻ: രണ്ടാം ട്വൻറി20 മത്സരത്തിൽ ഇന്ത്യ ദക്ഷിണാഫ്രിക്കയോട് പരാജയപ്പെട്ടപ്പോൾ നാണക്കേടിൻെറ റെക്കോർഡുകളുമായി സ്പിന്നർ യുസ്‍വേന്ദ്ര ചാഹൽ. ഏകദിന പരമ്പരയിലെ ഇന്ത്യൻ വിജയത്തിന് മുന്നിൽ നിന്ന് നയിച്ചത് ചാഹലാണ്. എന്നാൽ സെഞ്ചൂറിയനിൽ ഇന്ത്യൻ സ്പിന്നറെ തിരഞ്ഞ് പിടിച്ച് ആക്രമിക്കുകയായിരുന്നു ദക്ഷിണാഫ്രിക്കൻ ബാറ്റ്സ്മാൻമാ‍ർ.

നാലോവറിൽ 64 റൺസാണ് ചാഹൽ വഴങ്ങിയത്. ടി20യിൽ ഒരു മത്സരത്തിൽ ഏറ്റവും കൂടുതൽ റൺസ് വഴങ്ങുന്ന ഇന്ത്യൻ ബൗള‍‍ർ എന്ന റെക്കോ‍ർഡ് ഇനി ചാഹലിൻെറ പേരിലാണ്. ഇംഗ്ലണ്ടിനെതിരെ നാലോവറിൽ 57 റൺസ് വഴങ്ങിയ ജോഗീന്ദ‍ർ ശർമ്മയുടെ പേരിലായിരുന്നു നേരത്തെ ഈ റെക്കോ‍ർഡ്.

ഒരു ട്വൻറി മത്സരത്തിൽ ഏറ്റവും കൂടുതൽ സിക്സ‍ർ വഴങ്ങുന്ന ഇന്ത്യൻ ബൗള‍‍റായും ചാഹൽ മാറി. ദക്ഷിണാഫ്രിക്കൻ താരങ്ങൾ അടിച്ച് കൂട്ടിയ പത്തിൽ ഏഴ് സിക്സറും ചാഹലിൻെറ പന്തിലായിരുന്നു. ദക്ഷിണാഫ്രിക്കൻ ബാറ്റ്സ്മാൻ ക്ലാസനാണ് ചാഹലിനെ ഏറ്റവും നന്നായി നേരിട്ടത്. ചാഹൽ വഴങ്ങിയ 64ൽ 41 റൺസും അഞ്ച് സിക്സറും ക്ലാസൻെറ വകയാണ്.