ധോണിക്ക് ബൗളറുടെ ശരീരഭാഷ മനസ്സിലാവും: ചാഹൽ

ന്യൂഡൽഹി: ക്രിക്കറ്റിൽ പരിചയസമ്പത്ത് വളരെ പ്രധാനപ്പെട്ട ഘടകമാണ്. നിലവിൽ ഇന്ത്യൻ ക്രിക്കറ്റ് ടീമിലെ ഏറ്റവും പരിചയസമ്പത്തുള്ള ക്രിക്കറ്റർ മഹേന്ദ്ര സിങ് ധോണിയാണ്. ഇപ്പോഴും പല നിർണായക തീരുമാനങ്ങളും ധോണിയോട് ആലോചിച്ച് മാത്രമേ ക്യാപ്റ്റൻ കോഹ‍്‍ലി പോലും എടുക്കാറുള്ളൂ. ധോണിയാണ് ഇപ്പോഴും തൻെറ ക്യാപ്റ്റനെന്നും കോഹ‍്‍ലി പറഞ്ഞിരുന്നു.

ടീമിൻെറ വിക്കറ്റ് കീപ്പറായ ധോണിയുടെ പരിചയസമ്പത്ത് ഏറ്റവും കൂടുതൽ ഉപയോഗപ്പെടുന്നത് ബോളർമാർക്കാണ്. സ്റ്റംപിന് പിന്നിൽ നിന്ന് ബൗളറുടെ ശരീരഭാഷ മനസ്സിലാക്കാൻ സാധിക്കുന്ന അപൂർവം താരങ്ങളിൽ ഒരാളാണ് ധോണിയെന്ന് ഇന്ത്യൻ സ്പിന്നർ യുസ‍്‍വേന്ദ്ര ചാഹൽ പറഞ്ഞു. ടൈംസ് ഓഫ് ഇന്ത്യക്ക് നൽകിയ പ്രത്യേക അഭിമുഖത്തിലാണ് ചാഹൽ ഇക്കാര്യം പറഞ്ഞത്.

"മത്സരത്തിൻെറ ഏതെങ്കിലും ഘട്ടത്തിൽ ഉപദേശം ആവശ്യമായി വരുന്നുവെങ്കിൽ നേരെ ചെല്ലുന്നത് ധോണി ഭായിയുടെ അടുത്തേക്കാണ്. അദ്ദേഹം കൃത്യമായി കാര്യങ്ങൾ പറഞ്ഞ് തരും. അത് പോലെ ചെയ്യുമ്പോൾ വിജയം കൈവരിക്കുക തന്നെ ചെയ്യും," ചാഹൽ പറഞ്ഞു. ടീമിലെ മറ്റ് ബോളർമാരുടെയും അനുഭവം ഇങ്ങനെയായിരിക്കും.


ഏഷ്യാകപ്പിൽ പാകിസ്ഥാനെതിരായ മത്സരത്തിൽ പവർപ്ലേയിൽ പന്തെറിഞ്ഞതിനെ കുറിച്ചും ചാഹൽ വിശദീകരിച്ചു. "ഞാൻ ധോണി ഭായിയെ നോക്കി. അദ്ദേഹം അടുത്തേക്ക് വന്നു. സ്റ്റംപ് ടു സ്റ്റംപ് പന്തെറിയാൻ പറഞ്ഞു. ഞാൻ അങ്ങിനെ തന്നെ ചെയ്തു. എനിക്ക് ഇമാം ഉൾ ഹഖിനെ പുറത്താക്കാനും സാധിച്ചു," ചാഹൽ പറഞ്ഞു. ഇത്തരത്തിൽ ഒരുപാട് അനുഭവങ്ങളുണ്ടെന്നും ചാഹൽ കൂട്ടിച്ചേർത്തു.

ഏഷ്യാകപ്പിൽ ചാഹൽ അഞ്ച് മത്സരങ്ങിൽ നിന്ന് ആറ് വിക്കറ്റെടുത്തിരുന്നു. വിരാട് കോഹ‍്‍ലി മികച്ച ക്യാപ്റ്റനാണ്. പക്ഷേ ചില കാര്യങ്ങളിൽ സംശയം ഉണ്ടായാൽ അദ്ദേഹം പോലും ധോണിയെയാണ് ആശ്രയിക്കുന്നത്. അത് ടീമിന് ഗുണം ചെയ്യുന്നുണ്ടെന്നും ചാഹൽ കൂട്ടിച്ചേർത്തു.