മെസിയുടെ ജീവിതം ഒരു സന്ദേശമാണ് പരാജയം എന്നൊരു സംജ്ഞ ശബ്ദതാരാവലിയില് ഇല്ലെന്നുള്ള, എല്ലാം കാലത്തിനും വിധിക്കും വിട്ടുകൊടുക്കാത്ത വിധമുള്ള പോരാട്ടമാണ് ജീവിതവിജയം എന്ന സന്ദേശം! പിറന്നു വീണത് മുതല് കൈവന്ന പോരാട്ട വീര്യം കാലത്തിനോടും ശാസ്ത്രത്തോടും പ്രകൃതിയോടുമുള്ള പോരാട്ടം... ജീവന്റെ തുടിപ്പ് സിരകളില് നില നിര്ത്തുവാനുള്ള പോരാട്ടം.
അത് വിജയമായപ്പോള് അതില് നിന്ന് ലഭിച്ച ഊര്ജം കുമ്മായവരക്കുള്ളിലെ പച്ചപ്പുകള്ക്കിടയില് പന്ത് കൊണ്ട് കാണിക്കാനായ നൃത്ത വിസ്മയം അത് ബാലെ നര്ത്തകന്റെ ചലനങ്ങളെക്കാള് മനോഹരമായപ്പോള് കാല്പ്പന്തും ആ കുറിയ കാലുകളുമായുള്ള സമന്വയം ലോക ഫുട്ബാളില് പുത്തന് വിസ്മയ ചരിത്രങ്ങള് എഴുതിച്ചേര്ത്തു.. !
Also Read: HBD Messi: മെസി വേറെ ലെവൽ... മുന് കേരള ക്യാപ്റ്റന് ആസിഫ് സഹീര് എഴുതുന്നു
നൃത്തവും കവിതയും സംഗീതവും ചലച്ചിത്രവും ചിത്രകലയും ഒരേ നേരം ഒരേപോലെ ആസ്വദിക്കുന്ന വിധമായി ലിയോയുടെ കാലുകളും പന്തുമായുള്ള ആ ജന്മാന്തര സൗഹൃദം അതോടെ കല്പ്പന്തു കളിയില് പുതിയ ഒരു മിശിഹായുടെ പിറവിയുമായി. ഫുട്ബോള് കളിയുടെ അതുവരെയുണ്ടായിരുന്ന സൗന്ദര്യ ശാസ്ത്രത്തിനു പുത്തന് മുഖവുര ആവുകയായിരുന്നു മെസിയുടെ പന്തിനോടുള്ള പ്രണയം. അത് വിസ്മയ പാസുകളും സിരകളില് ലഹരി നിറക്കുന്ന ഗോളുകളുമായപ്പോള് ലോകം ആ കാല്ചുവടുകളുടെ ആരാധകരായി
അര്ജന്റീനയിലെ റൊസാരിയോ എന്ന കൊച്ചു പട്ടണത്തില് 1987 ജൂണ് 24 നു ജനിച്ച ലിയോ... നാലാം പിറന്നാളിന് പിതാവ് സമ്മാനിച്ച പന്തുമായിത്തുടങ്ങിയ പ്രണയം ഇന്ന് മുപ്പത്തിമൂന്നാം വയസിലും തുടരുകയാണ് ലോകമെമ്പാടുമുള്ള ആരാധകരെ ആനന്ദത്തിനും ഉന്മാദത്തിനുമപ്പുറമുള്ള അവസ്ഥാന്തരത്തില് എത്തിച്ചുകൊണ്ട്. ഫുട്ബോള് ലോകം അങ്ങയോടു കടപ്പെട്ടിരിക്കുന്നു ലിയോ ഹൃദയത്തിന്റ അടിത്തട്ടില് നിന്നുന്നുള്ള പിറന്നാള് ആശംസകള്, പ്രാര്ത്ഥന.
Also Read: HBD Messi: മെസി: ആത്മവിശ്വാസത്തിന്റെ ആള്രൂപം.. അരുണ് പെരൂളി എഴുതുന്നു