ആപ്പ്ജില്ല

ബ്രയാൻ ലാറ: ആന്‍റിഗ്വയുടെ കാമുകൻ... റെക്കോർഡുകളുടെ തോഴൻ!

മുങ്ങിക്കൊണ്ടിരുന്ന വിൻഡീസ് ക്രിക്കറ്റ് ഓരോ തവണയും അയാളിൽ ഒരു രക്ഷകനെ കണ്ടിരുന്നു - ബ്രയാൻ ചാൾസ് ലാറയിൽ. റെക്കോർഡുകളുടെ ഇഷ്ടതോഴനായ ലാറയെക്കുറിച്ച് സുരേഷ് വാരിയത്ത് എഴുതുന്നു.

Samayam Malayalam 22 Jun 2020, 1:53 pm
കിങ്ങ് ലാറ - പതിനേഴ് വർഷക്കാലം വിൻഡീസ് ബാറ്റിങ്ങിനെ മുന്നിൽ നിന്നു നയിച്ച ആ ട്രിനിഡാഡ് വസന്തത്തെ അന്നാട്ടുകാർ അങ്ങനെയാണ് വിളിക്കുന്നത്. ഓരോ ഇന്നിങ്സിനായും അയാൾ ഗ്രൗണ്ടിലേക്ക് പ്രവേശിക്കുമ്പോൾ വിൻഡീസിലെ സ്റ്റേഡിയം മുഴുവൻ എഴുന്നേറ്റു കയ്യടിക്കും. അരക്കു മുകളിൽ വരുന്ന ഗുഡ് ലെങ്ത് പന്തുപോലും കവറിലൂടെ മനോഹരമായി ബൗണ്ടറി കടത്തുമ്പോൾ, ലോകോത്തര ബൗളിങ് നിരകളെ ഒരു നർത്തകന്റെ പാദ ചലനത്തെ ഓർമിപ്പിക്കുന്ന ഫൂട്ട് വർക്കിലൂടെ നേരിടുമ്പോൾ ആ ഗ്യാലറികൾ അയാൾക്ക് വേണ്ടി ആർത്തു വിളിക്കും.
Samayam Malayalam suresh varieth writes about former west indies captain brian lara
ബ്രയാൻ ലാറ: ആന്‍റിഗ്വയുടെ കാമുകൻ... റെക്കോർഡുകളുടെ തോഴൻ!


​പ്രിൻസ് ഓഫ് ട്രിനിഡാഡ്

ബ്രസീലിന് ഫുട്ബോൾ എന്ന പോലെ വെസ്റ്റിന്ത്യൻ ജനതക്ക് ക്രിക്കറ്റ് ജീവവായുവാണ്. അവർക്ക് ക്രിക്കറ്റെന്നാൾ ചടുലതാളമാണ്. പത്തൊമ്പതാം നൂറ്റാണ്ടിലെ കോളനിവൽക്കരണത്തിന്റെ അവശിഷ്ടം പേറുന്ന മനസ്സുകൾക്ക് ക്രിക്കറ്റിലൂടെ നേടുന്ന ഓരോ വിജയവും ആഘോഷിക്കാനുള്ളതാണ്. അതിനാൽ തന്നെയാണ് സോബേഴ്സിനും റിച്ചർഡ്സിനും ശേഷം പ്രിൻസ് ഓഫ് ട്രിനിഡാഡിനെ അവർ വിൻഡീസ് ക്രിക്കറ്റിന്റെയും ലോക ക്രിക്കറ്റിന്റെയും അടുത്ത കിരീടാവകാശിയായി തെരഞ്ഞെടുത്തത്.

​ലാറ എന്ന താരോദയം

1990ൽ അരങ്ങേറിയ ട്രിനിഡാഡ് രാജകുമാരനെ ശ്രദ്ധിച്ച് തുടങ്ങിയത് 92 ലെ ലോകകപ്പ്, വിൻഡീസ് - പാകിസ്ഥാൻ മത്സരം മുതലാണ്. വസീം അക്രമിന്റെയും അക്വിബ് ജാവേദിന്റെയും ഇമ്രാന്റെയും പന്തുകളെ നേരിട്ട് 88 റൺസ് നേടി, ഒടുവിൽ പാകിസ്ഥാൻ പേസ് ത്രയം മുറിവേൽപ്പിച്ച പാദവുമായി റിട്ടയർ ചെയ്യുമ്പോൾ വിൻഡീസ് പത്തു വിക്കറ്റ് വിജയം ഉറപ്പിച്ചിരുന്നു. പിന്നീടെത്രയെത്ര ഇന്നിംഗ്സുകൾ. ആദ്യ ടെസ്റ്റ് സെഞ്ചുറി സിഡ്നിയിൽ ഓസീസിനെതിരെ 277.

റെക്കോർഡുകളെ പ്രണയിച്ചവൻ

തന്റെ മുൻഗാമി ഗാരി സോബേഴ്സിന്റെ റെക്കോർഡ് തിരുത്തിയ 375. ഹനീഫ് മൊഹമ്മദിന്റെ റെക്കോർഡ് തിരുത്തി വാർവിക് ഷയറിനു വേണ്ടി ഡർഹമിനെതിരെ 501 എന്ന മാസ്മര സംഖ്യ നേടിയത്. തുടർച്ചയായ 8 ഫസ്റ്റ് ക്ലാസ് മത്സരങ്ങളിൽ 7 സെഞ്ചുറി നേടിയ ഇന്നുവരെ തകരാത്ത റെക്കോർഡ്. വാൽഷിന്നെയും സർവനെയുമെല്ലാം കൂട്ടുപിടിച്ച് ഓസീസിനെതിരെ റെക്കോർഡ് ചേസിങ്. റോബിൻ പീറ്റേഴ്സനെ ഒരോവറിൽ 28 റൺസ്. അതെ, ടെസ്റ്റ് ക്രിക്കറ്റ് കണ്ടതിൽ ഏറ്റവും മികച്ച ബാറ്റ്സ്മാൻമാരിലൊരാളായ ലാറയെ കുറിച്ചുള്ള ഓർമകൾക്ക് യാതൊരു ലോഭവുമില്ല.

​ആന്റിഗ്വയുടെ കാമുകൻ

ബ്രയാൻ ചാൾസ് ലാറ - അയാളും ആൻറിഗ്വ റിക്രിയേഷൻ ഗ്രൗണ്ടും തമ്മിലുള്ള പ്രണയത്തിന് പത്തു വർഷം പ്രായമുണ്ട്. 2004 ഏപ്രിലിൽ, മൈക്കിൾ വോണിന്റെ കീഴിൽ കരുത്തരായ ഇംഗ്ലീഷ് ടീമിനെതിരെ കളിക്കുന്ന അതേ ഗ്രൗണ്ടിൽ കൃത്യം പത്തു വർഷം മുമ്പൊരു ഏപ്രിലിൽ മൈക്ക് അതേർട്ടന്റെ ടീമിനെതിരെയാണയാൾ തന്റെ മുൻഗാമിയുടെ റെക്കോർഡ് തിരുത്തിക്കുറിച്ച് 375 റൺസ് നേടിയത്. കരീബിയൻ ക്രിക്കറ്റ് അതിന്റെ ഏറ്റവും പരിതാപകരമായ അവസ്ഥയിലാണ്. ഗെയ്ൽ, സർവൻ, ചന്ദർപോൾ എന്നിങ്ങനെ കൂട്ടാളികളുണ്ടെങ്കിലും ക്യാപ്റ്റൻ ലാറയുടെ ബൗളിങ് യൂണിറ്റ് അമ്പൊഴിഞ്ഞ ആവനാഴി യാണിന്ന്.

​ലാറയുടെ ദുഖങ്ങൾ

ശക്തരായ ഇംഗ്ലീഷ് നിര ആദ്യ മൂന്നു ടെസ്റ്റും നേടി പരമ്പര തൂത്തുവാരാനാണ് ആന്റിഗ്വയിൽ ഇറങ്ങുന്നത്. ലാറയ്ക്കാകട്ടെ മറ്റൊരു സ്വകാര്യമായ ദു:ഖം കൂടെ ഉണ്ടായിരുന്നിരിക്കാം. പത്തു വർഷത്തോളം താൻ കൈവശം വച്ച, ഏറ്റവുമുയർന്ന ടെസ്റ്റ് സ്കോർ എന്ന റെക്കോർഡ് ആറുമാസം മുമ്പ്, ഓസ്ട്രേലിയയുടെ ഓപ്പണിങ് സെൻസേഷൻ മാത്യു ഹെയ്ഡൻ കയ്യടക്കിയതാണ്. അതിനൊപ്പം, നിരന്തരമായ തോൽവികളിൽ ചോദ്യം ചെയ്യപ്പെടുന്ന ക്യാപ്റ്റൻസിയുടെ അമിതഭാരവും.

​കൊടുങ്കാറ്റിന് മുമ്പ്

ആദ്യ ഇന്നിംഗ്സ്. പതിനാലാം ഓവറിൽ ക്രീസിലെത്തിയ കിംഗ് ലാറ പതിവിലേറെ ശ്രദ്ധാലുവാണ്. ഒരു സമ്പൂർണ പരാജയം മാത്രമല്ല, ക്യാപ്റ്റൻസിയും ബാറ്റിങ് ഫോം തന്നെയും ചോദ്യചിഹ്നമാണ്. മൂന്ന് ടെസ്റ്റിൽ ആകെ സമ്പാദ്യം 100 റൺസ് മാത്രം. ഗെയ്ലിന്നെ നഷ്ടപ്പെട്ടതിനു ശേഷം ഒത്തു ചേർന്ന രാം നരേഷ് സർവനോടൊപ്പം അയാൾ ലഞ്ചിനു കയറി. ശക്തമായ കാറ്റു തടസ്സപ്പെടുത്തിയ രണ്ടാം സെഷൻ ഒരു കൊടുങ്കാറ്റിനുള്ള മുന്നറിയിപ്പു കൂടിയായിരുന്നു.

​നിലയുറപ്പിച്ച് ലാറ

പതിയെ ഇന്നിംഗ്സിന്റെ നിയന്ത്രണം ഏറ്റെടുത്ത ലാറ ആൻഡ്രൂ കാഡിക്കിനെ മനോഹരമായി സ്ക്വയർ കട്ട് ചെയ്ത് ഇരുപത്തിയഞ്ചാം സെഞ്ചുറിയിലേക്ക് എത്തി. രണ്ടാം ദിവസം സർവനെ നഷ്ടപ്പെട്ടെങ്കിലും റിക്കാർഡോ പവലിനെയും റിയാൻ ഹൈൻഡ്സിനെയും കൂട്ടുപിടിച്ച് പോരാട്ടം തുടർന്ന അദ്ദേഹം, സ്പിന്നർ ഗാരത് ബാറ്റിക്കെതിരെ കടന്നാക്രമിച്ച് 200, 300 എന്നീ നാഴികക്കല്ലുകളിലേക്ക്. തുടർന്നൊരല്പം വേഗത കുറച്ച്, കൂടെ നിൽക്കുന്ന റിഡ്ലി ജേക്കബ്സിനു സെഞ്ചുറി നേടാനുള്ള ഒരവസരം നൽകി.

​400ന്റെ നിറവിലേക്ക്

ശേഷം, ക്ഷീണിച്ച് അവശരായ ഇംഗ്ലീഷ് നിരയെ തല്ലിച്ചതച്ചു കൊണ്ട്, ഗാരത് ബാറ്റിയെ 380 ൽ നിന്ന് ബൗണ്ടറിയിലേക്ക് പായിച്ച് 384 ലേക്ക്. വീണ്ടെടുത്തു തന്ന റെക്കോർഡിന് സ്നേഹപ്രകടനമായി തന്റെ നിത്യ പ്രണയിനിയായ ആൻറിഗ്വ പിച്ചിന് ഒരു ചുംബനം. തുടർന്നധികം താമസമില്ലാതെ ഫൈൻ ലെഗിലേക്ക് സിംഗിൾ എടുത്ത് 400 എന്ന, കഴിഞ്ഞ പതിനാറു കൊല്ലമായി ആരും തകർക്കാത്ത മാന്ത്രിക സംഖ്യയിലേക്ക്. 43 ഫോറുകളും നാലു സിക്സറുകളും തിലകം ചാർത്തിയ ഇന്നിംഗ്സ്.

​ലാറയാണ് ശരി

തുടർന്ന് ബാറ്റു ചെയ്ത ഇംഗ്ലണ്ടിന് ഫോളോഓൺ ചെയ്യേണ്ടി വന്നെങ്കിലും ട്രെസ്കോത്തിക്കിന്റെയും വോണിന്റെയും മികവിൽ പിടിച്ചു നിന്ന് ഇംഗ്ലണ്ട് സമനില പിടിച്ചു. രണ്ടു തവണ പുറത്താക്കാൻ സമയമുണ്ടായിരുന്നെങ്കിലും ദുർബലമായ വിൻഡീസ് ബൗളിങ് നിര പരാജയമായി. ലോക റെക്കോർഡിനു വേണ്ടി ഡിക്ളറേഷൻ വൈകിപ്പിച്ച് ജയസാധ്യത കൈവിട്ടെന്ന വിമർശനം പല കോണിൽ നിന്നും ഉയർന്നെങ്കിലും, ലാറയായിരുന്നു ശരി എന്നു തെളിയിക്കുന്നതാണ് നാളിതുവരെയും തകരാതെ നിൽക്കുന്ന ആ റെക്കോർഡ്.

ആര്‍ട്ടിക്കിള്‍ ഷോ

ട്രെൻഡിങ്