2022 ഫിഫ ലോകകപ്പിന്‍റെ ലോഗോ പ്രകാശനം ഉടന്‍; ഇക്കുറി ഏറെ പ്രത്യേകതകള്‍

ദോഹ: 2022ലെ ഖത്തര്‍ ലോകകപ്പ് ഫുട്ബോളിന്‍റെ ലോഗോ പ്രകാശനം ഇന്ന് നടക്കും. സെപ്റ്റംബർ 3 ചൊവ്വാഴ്ച്ച ഖത്തർ സമയം രാത്രി 8.22 നാണ് ലോകകപ്പിന്‍റെ ലോഗോയും ഔദ്യോഗിക ചിഹ്നവും ഫിഫ അനാവരണം ചെയ്യുന്നത്. ഫിഫയുടെ ഔദ്യോഗിക വെബ്സൈറ്റിൽ ലോഗോ പ്രകാശനം നടക്കുമ്പോൾ അന്താരാഷ്ട്ര ഡിജിറ്റൽ ക്യാമ്പയിന്‍റെ ഭാഗമായി 23 ലോകരാജ്യങ്ങളിലും ഖത്തറിലെ പ്രധാന കെട്ടിടങ്ങൾക്ക് മുകളിലും ഒരേ സമയം ലോഗോ അനാവരണം ചെയ്യപ്പെടും.

അതേസമയം ദോഹ കോര്‍ണീഷിൽ സ്ഥിതി ചെയ്യുന്ന ഖത്തറിന്‍റെ അഭിമാന സ്തംഭങ്ങളായ കൂറ്റന്‍ ടവറുകള്‍ക്ക് മുകളിലും, കത്താറ ആംഫി തീയറ്റര്‍, സൂഖ് വാഖിഫ്, ,ഷെറാട്ടണ്‍ ഹോട്ടല്‍, ടോര്‍ച്ച് ടവര്‍ ദോഹ, ദോഹ ടവര്‍, സുബാറ ഫോര്‍ട്ട്, ആഭ്യന്തര മന്ത്രാലയം തുടങ്ങിയ പ്രധാന കെട്ടിടങ്ങളിലും ബുധനാഴ്ച ഖത്തര്‍ സമയം രാത്രി 08.22 ന് ലോഗോ പ്രദര്‍ശിപ്പിക്കും ഇതിനുള്ള ഒരുക്കങ്ങൾ പൂർത്തിയായതായി ഫിഫ അധികൃതര്‍ അറിയിച്ചു. മനോഹരമായ ലേസര്‍ വെളിച്ചത്തില്‍ അലങ്കരിച്ചാണ് ലോഗോ പ്രദര്‍ശിപ്പിക്കുക.

ഖത്തറിന് പുറമേ മിഡില്‍ ഈസ്റ്റിലെ മറ്റ് രാജ്യങ്ങളിലും തത്സമയം ലോഗോ പ്രദര്‍ശിപ്പിക്കും. കുവൈത്തിലെ കുവൈത്ത് ടവര്‍, ജോര്‍ദ്ദാനിലെ ലെ റോയല്‍ അമ്മാന്‍ ഹോട്ടല്‍, ഒമാനിലെ ഒപ്പേര ഹൗസ്, ലബനാനിലെ അല്‍ റൌഷ റോക്ക്, ഇറാഖിലെ ബാഗ്ദാദ് ടവര്‍, തുണീഷ്യയിലെ ഹമ്മാമത്ത് സിറ്റി, അള്‍ജീരിയയിലെ ഒപ്പേര ഹൗസ്, മൊറോക്കോയിലെ അല്‍ റെബാത്ത് കോര്‍ണിഷ് എന്നിവിടങ്ങളിലും ലോകകപ്പ് ചിഹ്നം പ്രദര്‍ശിപ്പിക്കും.

മിഡില്‍ ഈസ്റ്റിന് പുറമെ ബ്രസീല്‍, അര്‍ജന്‍റീന, ഇംഗ്ലണ്ട്, ചിലി, ഫ്രാന്‍സ്, ജര്‍മ്മനി, അമേരിക്ക, ഇറ്റലി തുടങ്ങി ഇന്ത്യയുള്‍പ്പെടെയുള്ള 23 രാജ്യങ്ങളിലും ലോഗോ പ്രകാശനം ഒരേസമയം നടക്കും. ഇന്ത്യയില്‍ മുംബൈയിലെ ബാബുല്‍ നാഥ് ജംഗ്ഷനിലാണ് ലോഗോ പ്രദര്‍ശനം ഒരുക്കുന്നത്. വിപുലമായ തയ്യാറെടുപ്പുകളാണ് ലോഗോ പ്രകാശനത്തോടനുബന്ധിച്ച് രാജ്യത്തിനകത്തും പുറത്തുമായി ഖത്തര്‍ നടത്തുന്നത്.