മെസ്സിക്ക് ടീമിൽ നിന്ന് ലഭിക്കുന്ന പിന്തുണ കുറവെന്ന് മറഡോണ

ന്യൂഡൽഹി: നിർണായക മത്സരത്തിൽ ഇന്ന് അർജൻറീന ക്രൊയേഷ്യക്കെതിരെ ഇറങ്ങുകയാണ്. എന്ത് വില കൊടുത്തും ലാറ്റിനമേരിക്കൻ ടീമിന് ജയിച്ചേ തീരൂ. സമനില കൊണ്ട് പോലും കാര്യമുണ്ടായെന്ന് വരില്ല. സൂപ്പർ താരം ലയണൽ മെസ്സിക്ക് ടീമിലെ സഹകളിക്കാരിൽ നിന്ന് മികച്ച പിന്തുണ ലഭിക്കേണ്ടതുണ്ടെന്ന് ഫുട്ബോൾ ഇതിഹാസം ഡീഗോ മറഡോണ പറഞ്ഞു.

മെസ്സിക്ക് പിന്തുണ ലഭിക്കാതിരുന്നാൽ അർജൻറീനക്ക് കാര്യങ്ങൾ എളുപ്പമാവില്ല. ക്രൊയേഷ്യക്കെതിരായ മത്സരത്തിന് മുമ്പ് ടൈംസ് ഒാഫ് ഇന്ത്യക്ക് നൽകിയ പ്രത്യേക അവലോകനത്തിലാണ് അദ്ദേഹം ഇക്കാര്യം വ്യക്തമാക്കിയത്.

ലോകത്തിലെ ഏറ്റവും മികച്ച മധ്യനിരയുള്ള ടീമുകളിൽ ഒന്നാണ് ക്രൊയേഷ്യ. ലൂക്ക മോഡ്രിച്ചും ഇവാൻ റാക്കിടിച്ചും ചേർന്നാണ് അവരുടെ കളി മെനയുന്നത്. മാൻസുക്കിച്ചിനെ പോലെ മികച്ച ഒരു സ്ട്രെക്കറും അവർക്കുണ്ട്. എെസ‍്‍ലൻറിനെ പോലെ പ്രതിരോധത്തിൽ ഊന്നിയ കളിയായിരിക്കില്ല അവരുടെ ഭാഗത്ത് നിന്ന് ഉണ്ടാവുകയെന്നും മറഡോണ പറയുന്നു.

മെസ്സിയും അഗ്യൂറോയും മികച്ച ഫോമിൽ കളിക്കുന്നവരാണ്. സ്വാഭാവികമായും ക്രൊയേഷ്യൻ പ്രതിരോധം ഇവരെയായിരിക്കും പ്രധാനമായും ലക്ഷ്യമിടുന്നത്. ആക്രമിച്ച് കളിക്കുന്നതിൻെറ ഉത്തരവാദിത്വം മറ്റൊരു താരം കൂടെ ഏറ്റെടുക്കണം. ഡി മരിയക്ക് അതിന് സാധിക്കുന്നില്ല. പോളോ ഡിബാല അത് മറി കടക്കാൻ പറ്റുന്ന താരമായിരിക്കും, മറഡോണ കൂട്ടിച്ചേർത്തു.