ഇംഗ്ലണ്ടിനെതിരായ മത്സരത്തിൽ ലുക്കാക്കു കളിച്ചേക്കില്ല

മോസ്കോ: ലോകകപ്പിൽ ഇംഗ്ലണ്ടിനെതിരായ മത്സരത്തിൽ ബെൽജിയത്തിൻെറ സൂപ്പർ സ്ട്രൈക്കർ റൊമേലു ലുക്കാക്കു കളിക്കില്ലെന്ന് സൂചന. ശനിയാഴ്ച ടുണീഷ്യയുമായി നടന്ന മത്സരത്തിനിടെ കണങ്കാലിനേറ്റ പരിക്കാണ് തിരിച്ചടിയായത്. ബെൽജിയം ക്യാപ്റ്റൻ ഈഡൻ ഹസാർഡിനും മത്സരത്തിനിടെ പരിക്കേറ്റിട്ടുണ്ട്. അദ്ദേഹത്തിൻെറ കാര്യത്തിലും ആശങ്ക തുടരുകയാണ്.

ടുണീഷ്യക്കെതിരായ മത്സരത്തിൽ ഇരുവരും രണ്ട് ഗോൾ വീതം നേടിയിരുന്നു. ഇരുവരെയും രണ്ടാം പകുതിയിൽ പിൻവലിക്കേണ്ടിയും വന്നു. ആദ്യ രണ്ട് മത്സരങ്ങളിൽ മികച്ച വിജയം നേടിയ ബെൽജിയം പ്രീ ക്വാർട്ടർ ഉറപ്പിച്ച് കഴിഞ്ഞു. എന്നാൽ ആദ്യ റൗണ്ടിൽ ഇംഗ്ലണ്ടിനെ പോലെ ശക്തരായ ടീമിനെതിരെയുള്ള മത്സരം അവർക്ക് നിർണായകമാണ്.