അർജൻറീനയുടെ പരാജയം: മറഡോണം മുഖം പൊത്തിക്കരഞ്ഞു!

മോസ്കോ: ക്രൊയേഷ്യക്കെതിരായ പരാജയത്തിൽ ലോകമെങ്ങുമുള്ള അർജൻറീന ആരാധകർക്കൊപ്പം പൊട്ടിക്കരഞ്ഞ് ഫുട്ബോൾ ഇതിഹാസം ഡീഗോ മറഡോണ. അർജൻറീന 3-0ന് ദയനീയ തോൽവി ഏറ്റു വാങ്ങുന്നത് കണ്ട് സഹിക്കാതെയാണ് വിഎെപി ഗ്യാലറിയിലിരുന്ന മറഡോണ മുഖം പൊത്തിക്കരഞ്ഞത്.

മത്സരത്തിന് മുമ്പ് മറഡോണ ഏറെ ആവേശത്തിലായിരുന്നു. മെസ്സിയുടെ പേരെഴുതിയ ജഴ്സിയിൽ ചുംബിച്ച് കൊണ്ട് അദ്ദേഹം ആരാധകർക്കും ആവേശം പകർന്നു. എന്നാൽ ഒന്നിന് പിറകെ മൂന്ന് ഗോളുകൾ വീണ് അർജൻറീനയുടെ ഗോൾവല നിറഞ്ഞപ്പോൾ ഇതിഹാസവും കണ്ണീരണിഞ്ഞു.

അർജൻറീനയുടെ പരിശീലകൻ സാംപോളിക്കെതിരെ നേരത്തെ തന്നെ മറഡോണ വിമർശനം ഉയർത്തിയിരുന്നു. ആദ്യ മത്സരത്തിന് ശേഷം അദ്ദേഹം ടീമിൽ മാറ്റം വരുത്തണമെന്ന് നിർദ്ദേശിക്കുകയും ചെയ്തിരുന്നു. എന്നാൽ അതൊന്നും ചെവിക്കൊള്ളാതെയാണ് സാംപോളി ക്രൊയേഷ്യക്കെതിരായ മത്സരത്തിൽ ടീമിനെ ഇറക്കിയത്.