'മാന്യതയുടെ കളി'യിൽ സെനഗലിനെ തോൽപ്പിച്ച് ജപ്പാൻ!

ലോകകപ്പിലെ എച്ച് ഗ്രൂപ്പ് താരതമ്യേന ദുർബലരുടെ ഗ്രൂപ്പായിരുന്നു. എന്നാൽ കളിയാവേശം ഒട്ടും ചോരാതെയാണ് കൊളംബിയയും ജപ്പാനും സെനഗലും പോളണ്ടും പോരടിച്ചത്. ഗ്രൂപ്പിലെ അവസാന മത്സരത്തിൻെറ അവസാന നിമിഷം വരെ പ്രീ ക്വാ‍ർട്ടറിലേക്ക് ആരെന്ന അനിശ്ചിതത്വവും തുടർന്നു.

പോളണ്ടും ജപ്പാനും തമ്മിലും സെനഗലും കൊളംബിയയും തമ്മിലുമായിരുന്നു ഗ്രൂപ്പിലെ അവസാന മത്സരം. നാല് പോയിൻറുമായി സെനഗലും ജപ്പാനുമായിരുന്നു മുന്നിലുണ്ടായിരുന്നത്. സമനില കൊണ്ട് തന്നെ ഇരുടീമുകൾക്കും മുന്നോട്ട് പോവാം. എന്നാൽ കൊളംബിയ സെനഗലിനെയും പോളണ്ട് ജപ്പാനെയും തോൽപ്പിച്ചതോടെ കളി മാറി.

ആറ് പോയിൻറുമായി കൊളംബിയ ഒന്നാമതെത്തി. നാല് പോയിൻറ് വീതമുള്ള ജപ്പാനും സെനഗലും രണ്ടാം സ്ഥാനത്ത്. ജപ്പാനും സെനഗലും തമ്മിൽ നടന്ന മത്സരം സമനിലയായിരുന്നു. ഗോൾ ശരാശരിയിലും ഇരുടീമുകളും ഒപ്പത്തിനൊപ്പം. ഒടുവിൽ ഫെയ‍ർ പ്ലേ ആണ് രണ്ടാം സ്ഥാനക്കാരെ നി‍ർണയിച്ചത്. ആറ് മഞ്ഞക്കാ‍ർഡുകൾ കണ്ട സെനഗൽ പുറത്തായി.

നാല് മഞ്ഞക്കാ‍ർഡുകൾ കണ്ട ജപ്പാൻ മുന്നോട്ട്. പോയിൻറിലും ഗോൾശരാശരിയിലും ഒപ്പമെത്തുകയും ഇരു ടീമുകളും തമ്മിലുള്ള മത്സരം സമനിലയാവുകയും ചെയ്താൽ ഫെയ‍ർപ്ലേയിൽ മുന്നിൽ നിൽക്കുന്ന ടീം മുന്നോട് പോവണമെന്നാണ് ഫിഫയുടെ നിയമം.