ലോകകപ്പും മെസിയെയും കാണണം; സൈക്കിളില്‍ ഒരു മലയാളി

റഷ്യ 2018 ലോകകപ്പ് കാണാന്‍ പോകാന്‍ ഫുട്ബോള്‍ ഭ്രാന്തനായ ഒരു മലയാളി തെരഞ്ഞെടുത്തത് സൈക്കിള്‍. കൊച്ചിയില്‍ നിന്നുള്ള 28 വയസുകാരന്‍ ക്ലിഫിന്‍ ഫ്രാന്‍സിസ് ആണ് ഈ -കട്ട ആരാധകന്‍-. സൈക്കിള്‍ ചവിട്ടി പോകുന്നത് വെറുതയല്ല. അര്‍ജന്‍റീന സ്ട്രൈക്കര്‍ ലയണല്‍ മെസിയില്‍ നിന്ന് സൈക്കിളില്‍ ഒരു ഒപ്പു വാങ്ങണമെന്നാണ് ക്ലിഫിന്‍ ആഗ്രഹിക്കുന്നത്.

ലോകകപ്പ് കാണാന്‍ അതിയായ ആഗ്രഹം ക്ലിഫിനുണ്ട്. പോക്കറ്റില്‍ പക്ഷേ, അത്രയും പണമില്ല. അതുകൊണ്ട് ഫ്രാന്‍സ്‍ - ഡെന്മാര്‍ക്ക് ഗ്രൂപ്പ് മത്സരം കണ്ടശേഷം റഷ്യ ചുറ്റിയടിച്ച് തിരികെ പോകാനാണ് തീരുമാനം.

ഫെബ്രുവരി 23ന് ആണ് ക്ലിഫിന്‍ യാത്ര തുടങ്ങിയത്. ഇപ്പോഴും മോസ്കോ നഗരം എത്തിയിട്ടില്ല. യുഎഇ, ഇറാന്‍, അസര്‍ബെയ്‍ജാന്‍ രാജ്യങ്ങളിലൂടെയായിരുന്നു യാത്ര. ജോര്‍ജ്യ വഴി റഷ്യയിലേക്ക് പോകാനായിരുന്നു ആദ്യം തീരുമാനിച്ചത്. പക്ഷേ, വീസ ലഭിച്ചില്ല. 600 കിലോമീറ്ററോളം സൈക്കിള്‍ ചവിട്ടിയാണ് ഇനി മോസ്‍കോയില്‍ എത്തേണ്ടത്.