ക്വാർട്ടറിൽ ഇന്ന് ലാറ്റിനമേരിക്കൻ Vs യൂറോപ്യൻ പോരാട്ടം

മോസ്കോ: ഫിഫ ലോകകപ്പിലെ ക്വാർട്ടർ ഫൈനൽ മത്സരങ്ങൾക്ക് ഇന്ന് തുടക്കം. രണ്ട് ലാറ്റിനമേരിക്കൻ ടീമുകളും രണ്ട് യൂറോപ്യൻ ടീമുകളുമാണ് മാറ്റുരയ്ക്കുന്നത്. ആദ്യ മത്സരത്തിൽ മുൻ ചാമ്പ്യൻമാരായ ഉറുഗ്വെ ഫ്രാൻസിനെ നേരിടും. രാത്രി 11.30ന് നടക്കുന്ന മത്സരത്തിൽ ബ്രസീൽ ബെൽജിയത്തെ നേരിടും.

കവാനിയുടെയും സുവാരസിൻെറയും പരിക്ക് ഉറുഗ്വെയ്ക്ക് തിരിച്ചടിയാണ്. പോർച്ചുഗലിനെതിരായ മത്സരത്തിൽ പരിക്കേറ്റ കവാനി പിന്നീട് പരിശീലനത്തിന് പോലും ഇറങ്ങിയിട്ടില്ല. ഇന്നും കളിക്കില്ലെന്നാമ് സൂചന. പകരം ക്രിസ്ത്യൻ സ്റ്റുവാനി കളിക്കും.

പരിശീലനത്തിനിടെയാണ് സുവാരസിന് പരിക്കേറ്റത്. എന്നാൽ സുവാരസ് കളിക്കുമെന്നാണ് റിപ്പോർട്ട്. അർജൻറീനക്കെതിരെ വിജയം നേടിയതിൻെറ ആത്മവിശ്വാസത്തിലാണ് ഫ്രാൻസ്. എംബാപ്പെയുടെ നേതൃത്വത്തിലുള്ള മുന്നേറ്റനിര മികച്ച ഫോമിലാണ്.

ബെൽജിയത്തിൻെറ സുവർണനിരയെ പരാജയപ്പെടുത്തുക എന്നത് ബ്രസീലിന് എളുപ്പമാവില്ല. എന്നാൽ മെക്സിക്കോക്കെതിരെ രണ്ട് ഗോളിന് നേടിയ ആധികാരിക വിജയം ടീമിൻെറ ആത്മവിശ്വാസം ഉയർത്തുന്നു. ടീം എന്ന നിലയിൽ ഒത്തൊരുമയോടെ കളിക്കാനാവുന്നു എന്നതാണ് ബ്രസീലിൻെറ കരുത്ത്. ജപ്പാനെതിരെ ശക്തമായ പോരാട്ടത്തിനൊടുവിൽ വിജയിച്ചാണ് ബെൽജിയം ക്വാർട്ടറിലെത്തിയത്.