ചാമ്പ്യൻമാ‍ർ തിരിച്ചെത്തി; ത്രില്ലിങ് ജയം സ്വന്തമാക്കി ജര്‍മനി

സോച്ചി: മികച്ച പോരാട്ട വീര്യം പുറത്തെടുത്ത ജര്‍മനിക്ക് സ്വീഡനെതിരെ മികച്ച ജയം. ഒന്നിനെതിരെ രണ്ടു ഗോളുകള്‍ക്കാണ് ജര്‍മനി സ്വീഡനെ പരാജയപെടുത്തിയത്. മത്സരം സമനിലയിലാവസാനിക്കുമെന്ന് തോന്നിച്ച ഘട്ടത്തിലാണ് ടോണി ക്രൂസ് ജര്‍മനിക്ക് ജയം നേടി കൊടുത്തത്. ഗോള്‍ നേടിയതോടെ മത്സരത്തില്‍ ആത്മവിശ്വാസം വീണ്ടെടുത്ത സ്വീഡന്‍ രണ്ടു തവണ ഗോളിന് അടുത്ത എത്തിയെങ്കിലും ഗോള്‍ നേടാനായില്ല.

32ാം മിനിറ്റില്‍ ടോയ്‌വോനനിലൂടെ സ്വീഡനാണ് ആദ്യം അക്കൗണ്ട് തുറന്നത്. ടോണി ക്രൂസിന്റെ മിസ് പാസില്‍ നിന്നാണ് ടൊയ്‌വോനെന്‍ വലകുലുക്കിയത്. ഇതോടെ ആദ്യ പകുതി 1-0ന് സ്വീഡനൊപ്പം നിന്നു. പൊരുതിക്കളിച്ച ജര്‍മനി 48ാം മിനിറ്റില്‍ സമനില പിടിച്ചു. ഗോമസിന്റെ അസിസ്റ്റില്‍ റൂസാണ് ജര്‍മനിക്ക് വേണ്ടി വലകുലുക്കിയത്.

മല്‍സരം 1-1 എന്ന നിലയിലായി. ഇഞ്ചുറി ടൈമില്‍ ബ്രാന്‍ഡിറ്റിന്റെ ശ്രമം പോസ്റ്റില്‍ തട്ടി തെറിച്ചെങ്കിലും മത്സരം അവസാനിക്കാന്‍ സെക്കന്‍ഡുകള്‍ മാത്രം ശേഷിക്കെ ടോണി ക്രൂസിന്റെ ഗോളില്‍ ജര്‍മനി ജയം പിടിച്ചെടുക്കുകയായിരുന്നു. ടോണി ക്രൂസിന്റെ ശ്രമം സ്വീഡന്‍ ഗോള്‍ വല കുലുക്കുമ്പോള്‍ ഇഞ്ചുറി ടൈം അഞ്ച് മിനുട്ടിലെത്തിയിരുന്നു.