സാം പോളി പുറത്തേയ്ക്ക്?

ഫ്രാന്‍സിനെതിരെ നടന്ന പ്രീ ക്വാര്‍ട്ടര്‍ മത്സരത്തില്‍ നേരിട്ട ദയനീയ പരാജയത്തിനു പിന്നാലെ പരിശീലകന്‍ ജോര്‍ജ് സാംപോളിയെ അര്‍ജന്റീന പുറത്താക്കിയതായി റിപ്പോര്‍ട്ട്. റിവര്‍ പ്ലേറ്റിന്റെ ഇപ്പോഴത്തെ പരിശീലകനും മുന്‍ അര്‍ജന്റീനിയന്‍ താരവുമായ മാഴ്‌സെലോ ഗല്ലാര്‍ഡോയായിരിക്കും ഇനി ടീമിന്റെ കോച്ചായി എത്തുക എന്നാണ് സൂചന.

ലോകകപ്പില്‍ ക്രൊയേഷ്യക്കെതിരായ മത്സരത്തിനു പിന്നാലെ തന്നെ കോച്ച്‌ സാംപോളിയെ പുറത്താക്കണമെന്നാവശ്യപ്പെട്ട് കളിക്കാര്‍ രംഗത്തെത്തിയിരുന്നു.

അതേസമയം, ഇനിയും തന്നെ പിന്തുണയ്ക്കുന്നുണ്ടെങ്കില്‍ 2019 കോപ്പ അമേരിക്ക കിരീടത്തിലേക്ക് നയിക്കാന്‍ കഴിയുമെന്നാണ് സാംപോളിയുടെ വാദം.
അഞ്ച് വര്‍ഷത്തെ കരാറായിരുന്നു അര്‍ജന്റീന സാംപോളിയുമായി ഒപ്പുവെച്ചിരുന്നത്.

സാംപോളിയോടുള്ള അനിഷ്ടം അര്‍ജന്റീനിയന്‍ താരങ്ങള്‍ വ്യക്തമാക്കി കഴിഞ്ഞു. അര്‍ജന്റീനയില്‍ നടത്തിയ വിവിധ സര്‍വേകളിലും ജനങ്ങള്‍ സാംപോളിക്ക് എതിരായ നിലപാടാണ് സ്വീകരിച്ചത്.

ലോകകപ്പ് യോഗ്യതാ റൗണ്ടില്‍ തപ്പിത്തടഞ്ഞാണ് ടീം റഷ്യയിലെത്തിയത്. എന്നാല്‍, എഡ്വാര്‍ഡോ ബൗസയ്ക്ക് പകരക്കാരനായെത്തിയ സാംപോളിക്ക് ടീമിനെ കാര്യമായ വിജയത്തിലെത്തിക്കാന്‍ കഴിഞ്ഞില്ല. മെസ്സിയുടെ സാന്നിധ്യം ടീമിന് ഗുണകരമായ രീതിയില്‍ മാറ്റിയെടുക്കാന്‍ കഴിയാത്തതാണ് പരിശീലകന് വിനയായത്.