സ്പെയിന് ശേഷം വരുമോ പുതിയൊരു ലോക ചാമ്പ്യൻ

മോസ്കോ: 2010ലാണ് ലോകകപ്പ് ഫുട്ബോളിന് വർഷങ്ങൾക്ക് ശേഷം പുതിയൊരു ലോകചാമ്പ്യനെ ലഭിക്കുന്നത്. ഫൈനലിൽ ഹോളണ്ടിനെ തോൽപ്പിച്ച് സ്പെയിൻ കപ്പ് നേടുമ്പോൾ മുൻ ചാമ്പ്യൻമാരുടെ അപ്രമാദിത്വത്തിനുള്ള തിരിച്ചടിയായിരുന്നു അത്. ഇത്തവണയും ലോകകപ്പിൽ പുതിയൊരു ചാമ്പ്യൻെറ പിറവി കണ്ടാൽ അതിൽ അത്ഭുതപ്പെടാനില്ല.

അട്ടിമറികളുടെ ലോകകപ്പാണ് 2018ലെ ഫുട്ബോൾ ലോകകപ്പ്. ജ‍ർമ്മനിയും അർജൻറീനയും സ്പെയിനും അടക്കമുള്ള മുൻ ചാമ്പ്യൻമാർ നേരത്തെ തന്നെ വീണു. ഇനി ക്വാർട്ടർ മത്സരങ്ങളിൽ എട്ട് ടീമുകളാണ് മാറ്റുരയ്ക്കുന്നത്. ഇതിൽ നാല് മുൻ ടീമുകൾ ലോക ചാമ്പ്യൻമാരാണ്.

ബ്രസീൽ, ഉറുഗ്വെ, ഫ്രാൻസ്, ഇംഗ്ലണ്ട് എന്നിവരാണ് ആ ടീമുകൾ. ഇതേവരെ ലോകകപ്പ് നേടാത്ത ക്രൊയേഷ്യ, ബെൽജിയം, റഷ്യ, സ്വീഡൻ എന്നീ നാല് ടീമുകളും ക്വാർട്ടറിലുണ്ട്. ഉറുഗ്വെ-ഫ്രാൻസ് മത്സരത്തോടെ ഒരു ചാമ്പ്യൻ കൂടെ പുറത്താവും.

ഇത് വരെ നടന്ന മത്സരങ്ങളിൽ മികച്ച പ്രകടനമാണ് ക്രൊയേഷ്യയും ബെൽജിയവും കാഴ്ച വെച്ചത്. സ്വീഡനും ഒട്ടും മോശമല്ല. ആതിഥേയരെന്ന ആനുകൂല്യം റഷ്യക്കുമുണ്ട്. ഈ നാല് ടീമുകളിൽ ഒന്ന് കപ്പ് നേടിയാൽ അത് പുതിയ ചരിത്രമാവും.