അക്കിലസ് പൂച്ച പറയുന്നു: അർജൻറീന നൈജീരിയയോട് തോൽക്കും

മോസ്കോ: ലോകകപ്പിൽ നൈജീരിയക്കെതിരെ ജീവൻ മരണ പോരാട്ടത്തിന് ഇറങ്ങുകയാണ് അർജൻറീന. തോറ്റാൽ ടീമിന് നാട്ടിലേക്ക് വണ്ടി പിടിക്കാം. ഇത്തവണ ലോകകപ്പിലെ മത്സരങ്ങൾ പ്രവചിക്കുന്ന അക്കിലസ് പൂച്ച പറയുന്നത് അർജൻറീന ഇന്ന് തോൽക്കുമെന്നാണ്. ഉദ്ഘാടന മത്സരം അടക്കം ഈ ലോകകപ്പിൽ അക്കിലസിൻെറ പ്രവചനങ്ങൾ മിക്കതും ശരിയായിരുന്നു.

രണ്ട് രാജ്യത്തിൻെറയും പതാകയ്ക്ക് അടുത്ത് ഭക്ഷണ പദാർഥങ്ങൾ വെച്ച് ഇതിൽ ഒന്ന് തെരഞ്ഞെടുക്കുകയാണ് അക്കിലസിൻെറ രീതി. നൈജീരിയ - അർജൻറീന മത്സരത്തിൻെറ പ്രവചനത്തിൽ നൈജീരിയയുടെ പതാകക്ക് അടുത്തു വെച്ച ഭക്ഷണമാണ് അക്കിലസ് തെരഞ്ഞെടുത്തത്.

പ്രവചനം ശരിയാവുകയാണെങ്കിൽ അർജൻറീനക്ക് പ്രീ ക്വാർട്ടർ കാണാതെ പുറത്തേക്ക് മടങ്ങാം. ഇല്ലെങ്കിൽ നൈജീരിയയെും അക്കിലസിൻെറ പ്രവചനവും മറികടന്ന് ടീമിന് മുന്നോട്ട് നീങ്ങാം.