അർജൻറീനക്കായി ലോകകപ്പ് നേടാതെ വിരമിക്കാനില്ല: മെസ്സി

മോസ്കോ: അർജൻറീനക്കായി ലോകകപ്പ് നേടണമെന്നത് തൻെറ ജീവിതത്തിലെ ഏറ്റവും വലിയ സ്വപ്നമാണെന്ന് സൂപ്പർതാരം ലയണൽ മെസ്സി. ആ സ്വപ്നം അത്ര പെട്ടെന്ന് ഉപേക്ഷിക്കാനാവില്ല. ലോകകപ്പ് നേടാതെ വിരമിക്കുന്നതിനെ കുറിച്ച് ചിന്തിക്കുന്നില്ലെന്ന് മെസ്സി പറഞ്ഞു.

"ലോകകിരീടം ഞാൻ കൈകളിൽ ഉയർത്തുന്നത് പലപ്പോഴും സ്വപ്നം കാണാറുണ്ട്. ഞാൻ ആ നിമിഷത്തിന് വേണ്ടി കാത്തിരിക്കുകയാണ്. ലോകമെങ്ങുമുള്ള അർജൻറീന ആരാധകർക്ക് അത് പകരുന്ന ആഹ്ലാദം ചെറുതായിരിക്കില്ല," മെസ്സി പറഞ്ഞു.

നേരത്തെ 2016 കോപ്പ അമേരിക്ക ഫൈനലിൽ ചിലിയോട് പരാജയപ്പെട്ടപ്പോൾ മെസ്സി വിരമിക്കൽ പ്രഖ്യാപിച്ചിരുന്നു. എന്നാൽ പിന്നീട് തിരിച്ചുവരവ് പ്രഖ്യാപിച്ചു. ഇത്തവണ ലോകകപ്പിൽ ആദ്യ മത്സരത്തിൽ സമനിലയും രണ്ടാം മത്സരത്തിൽ തോൽവിയുമായി അർജൻറീന രണ്ടാം റൗണ്ട് കടക്കുമോ എന്ന ആശങ്കയിലാണ്. വരുന്ന മത്സരത്തിൽ നൈജീരിയയെ തോൽപ്പിക്കാതെ ടീമിന് മുന്നോട്ട് പോവാനാവില്ല.