ലോകകപ്പ് 2026 വടക്കേ അമേരിക്കയിലെ മൂന്ന് രാജ്യങ്ങളിൽ

മോസ്കോ: 2026ലെ ഫുട്ബോൾ ലോകകപ്പ് വടക്കേ അമേരിക്കയിലെ മൂന്ന് രാജ്യങ്ങളിൽ നടക്കും. അമേരിക്ക, മെക്സിക്കോ, കാനഡ എന്നീ രാജ്യങ്ങളിലായാണ് ലോകകപ്പ് നടക്കുക. 1994ന് ശേഷം ഇതാദ്യമായാണ് വടക്കേ അമേരിക്ക ലോകകപ്പിന് ആതിഥ്യം വഹിക്കാൻ ഒരുങ്ങുന്നത്.

ഫിഫ ഗവേണിങ് ബോഡി യോഗത്തിലാണ് തീരുമാനം. വടക്കേ അമേരിക്കക്കൊപ്പം ആഫ്രിക്കൻ രാജ്യമായ മൊറോക്കോയും ലോകകപ്പ് ആതിഥ്യത്തിനായി മുന്നിലുണ്ടായിരുന്നു. മൊറോക്കോയെ പിന്തള്ളിയാണ് വോട്ടെടുപ്പിൽ വടക്കേ അമേരിക്ക വിജയിച്ചത്.

ഇതാദ്യമായാണ് ഫുട്ബോൾ ലോകകപ്പ് മൂന്ന് രാജ്യങ്ങളിലായി നടത്താൻ പോവുന്നത്. എന്നാൽ ഭൂരിപക്ഷം മത്സരങ്ങളും അമേരിക്കയിലാവും നടക്കുക. 60 മത്സരങ്ങൾ അമേരിക്കയിലും 10 വീതം മത്സരങ്ങൾ മെക്സിക്കോയിലും കാനഡയിലുമായി നടക്കുമെന്നാണ് റിപ്പോർട്ട്. 2022ൽ ഏഷ്യയിലെ ഖത്തറിലാണ് ഫുട്ബോൾ ലോകകപ്പ് നടക്കാൻ പോവുന്നത്.