സൗഹൃദ മത്സരത്തിൽ ഓസ്ട്രിയക്കെതിരെ ജർമ്മനിക്ക് തോൽവി

ന്യൂഡൽഹി: ലോകകപ്പ് സൗഹൃദ മത്സരത്തിൽ യൂറോപ്യൻ കരുത്തൻമാരായ ജർമ്മനിയെ തോൽപ്പിച്ച് ഓസ്ട്രിയ. ഒന്നിനെതിരെ 2 ഗോളുകൾക്കാണ് ഓസ്ട്രിയ വിജയം നേടിയത്. 32 വർഷത്തിനിടെ ജർമ്മനിക്കെതിരെ ആദ്യമായാണ് ഓസ്ട്രിയ ജയിക്കുന്നത്.

മത്സരത്തിൽ ഓസിലിലൂടെ ആദ്യം ഗോളടിച്ചത് ജർമ്മനി ആയിരുന്നു. എന്നാൽ 53ാം മിനിറ്റിൽ ഹിൻറർഗറിയിലൂടെ ഓസ്ട്രിയ സമനില പിടിച്ചു. അലസാന്ദ്രോ ഷാഫിലൂടെ അവർ വിജയഗോളും നേടി. ലോകകപ്പിന് ഏറ്റവും സാധ്യത കൽപ്പിക്കപ്പെടുന്ന ടീമായ ജർമ്മനിയാണ് പരാജയം ഏറ്റുവാങ്ങിയത്.

അതേസമയം മറ്റൊരു സൗഹൃദ മത്സരത്തിൽ ബെൽജിയത്തോട് പോർച്ചുഗൽ സമനില വഴങ്ങി. മറ്റൊരു മത്സരത്തിൽ ഒന്നിനെതിരെ രണ്ട് ഗോളുകൾക്ക് ഇംഗ്ലണ്ട് നൈജീരിയയെ തോൽപ്പിച്ചു.