കവാനിയുടെ ഇരട്ട ഗോള്‍; പോര്‍ച്ചുഗല്‍ പുറത്ത്

മോസ്‌കോ: ലോകകപ്പ് പ്രീക്വാര്‍ട്ടറില്‍ കവാനിയുടെ ഇരട്ട ഗോളില്‍ പോര്‍ച്ചുഗലിനെ തളച്ച്‌ ഉറുഗ്വായ് ക്വാര്‍ട്ടറില്‍. ആദ്യ പകുതിയില്‍ ഒരു ഗോളിന് മുന്നിട്ടുനിന്ന ഉറുഗ്വായ്‍ക്കെതിരെ രണ്ടാം പകുതിയുടെ തുടക്കത്തില്‍ പോര്‍ച്ചുഗല്‍ ഒപ്പമെത്തിയെങ്കിലും കവാനി ഹീറോയാവുകയായിരുന്നു. റൊണാള്‍ഡോ നിരാശപ്പെടുത്തിയപ്പോള്‍ 2-1ന്‍റെ തോല്‍വിയോടെ പോര്‍ച്ചുഗല്‍ ലോകകപ്പിൽ പുറത്തേക്ക്.

വ്യക്തമായ ആധിപത്യമുറപ്പിച്ചാണ് ഉറുഗ്വായ് തുടങ്ങിയത്. ഏഴാം മിനുറ്റില്‍ തന്നെ ഇതിന്‍റെ ഫലം കണ്ടു. സുവാരസിന്‍റെ ക്രോസില്‍ നിന്ന് തകര്‍പ്പന്‍ ഹെഡറിലൂടെ കവാനി ഉറുഗ്വായെ മുന്നിലെത്തിച്ചു. അതേസമയം ആക്രമണവും പ്രതിരോധവും ശക്തിപ്പെടുത്തി പോര്‍ച്ചുഗലിനെ ആദ്യ പകുതിയില്‍ ഉറുഗ്വായ് മനോഹരമായി തളയ്ക്കുകയും ചെയ്തു.

58-ാം മിനുറ്റില്‍ റാഫോല്‍ ഗുറേറോ എടുത്ത കോര്‍ണറില്‍ നിന്ന് ഹെഡറിലൂടെ പെപെ പോര്‍ച്ചുഗലിന്‍റെ സമനില ഗോള്‍ നേടി. റൊണോയെ മാര്‍ക്ക് ചെയ്ത ഉറുഗ്വെന്‍ താരങ്ങളെ പെപെ കളി പഠിപ്പിക്കുകയായിരുന്നു
62-ാം മിനുറ്റില്‍ ബെണ്‍ടാന്‍കറിന്‍റെ പാസില്‍ നിന്ന് കവാനിയുടെ സുന്ദരന്‍ ഫിനിഷിംഗ്. ഈ ഗോള്‍ ഉറുഗ്വെക്ക് 2-1ന്‍റെ ലീഡ് സമ്മാനിക്കുകയായിരുന്നു. പിന്നീട് നിരവധി ശ്രമങ്ങള്‍ പോർച്ചുഗൽ താരങ്ങള്‍ നടത്തിയെങ്കിലും ഗോള്‍ മാത്രം ഒഴിഞ്ഞുനിന്നു.