ഇംഗ്ലണ്ടിനെ തളച്ച് ക്രൊയേഷ്യ ഫൈനലിൽ

മോസ്‌കോ: ഫുട്ബോള്‍ ചരിത്രത്തിലാദ്യമായി ക്രൊയേഷ്യ ഫുട്‌ബോള്‍ ലോകകപ്പ് ഫൈനലില്‍. ഒന്നിനെതിരെ രണ്ട് ഗോളുകള്‍ക്ക് ചരിത്ര വിജയം നേടിയാണ് ഫ്രാൻസിന് ചേർന്ന എതിരാളികളായി ക്രൊയേഷ്യൻ കുതിപ്പ്.

മത്സരത്തിന്‍റെ അഞ്ചാം മിനിറ്റില്‍ കീരണ്‍ ട്രിപ്പിയറുടെ മനോഹരമായ ഫ്രീകിക്കിലൂടെ ഇംഗ്ലീഷ് പട മുന്നിലെത്തി. എന്നാല്‍ രണ്ടാം പകുതിയില്‍ ക്രൊയേഷ്യന്‍ പടയുടെ കളിമാറി. 68-ാം മിനിറ്റില്‍ ഇവാന്‍ പെരിസിച്ച്‌ ക്രൊയേഷ്യയ്ക്കായി സമനില ഗോള്‍ അടിച്ചിട്ടു. ഇരു ടീമുകളും ഓരോ ഗോള്‍ നേടി സമനില വഴങ്ങിയതോടെ അധിക സമയത്തേക്ക് മത്സരം നീണ്ടു. തുടര്‍ന്ന് 109-ാം മിനിറ്റില്‍ മന്‍സൂക്കിച്ചിന്റേതായിരുന്നു ക്രൊയേഷ്യയുടെ വിജയഗോള്‍. ഞായറാഴ്ച നടക്കുന്ന ഫൈനലില്‍ ഫ്രാന്‍സിനെ ക്രൊയേഷ്യ നേരിടും.